Աջափնյակ և Դավիթաշեն վարչական շրջանների ընդհանուր իրավասության դատարանում այսօր «Իրազեկ քաղաքացիների միավորում» հ/կ փորձագետ Կարեն Վարդանյանի սպանության գործով հերթական նիստն էր:
Հիշեցնենք՝ ամբաստանյալներ Գևորգ Զոհրաբյանին եւ Արթուր Միհրանյանին մեղադրանք է առաջադրվել այն բանի համար, որ նրանք 2016թ.-ին նախնական համաձայնությամբ, վստահությունը չարաշահելու և խաբեության միջոցով, գաղտնի առևանգել են Կարեն Վարդանյանին, այնուհետեւ՝ շահադիտական դրդումներով՝ դիտավորությամբ ապօրինաբար նրան զրկել կյանքից:
Ըստ մեղադրանքի, Զոհրաբյանն ու Միհրանյանը նաեւ գաղտնի հափշտակել են Կարեն Վարդանյանի զգալի չափի գույքը:
Այսօրվա նիստում ամբաստանյալներից Գևորգ Զոհրաբյանը հայտարարեց, որ հրաժարվում է իր պաշտպան Արմեն Մուղսիկարոյանից եւ խնդրում հանրային պաշտպան տրամադրել: Դատավոր Տաթեւիկ Գրիգորյանը որոշեց բավարարել նրա միջնորդությունը: Ըստ այդմ, նիստը հետաձգվեց եւ նշանակվեց օգոստոսի 23-ին, ժամը 12:30-ին: Դատաքննությունն ապացույցների հետազոտման փուլում է:
Լուիզա ՍՈՒՔԻԱՍՅԱՆ
