Մինչ անշեղորեն աճում է Վրաստան այցելող ռուսաստանցի զբոսաշրջիկների թիվը, «Ռոստուրիզմի» ղեկավարը ՌԴ քաղաքացիներին զգուշացնում է Վրաստան այցելելու վտանգների մասին:
Վրաստանում Ամերիկայի Միացյալ Նահանգների դեսպանությունը հայտարարել է, թե պատրաստ են ԱՄՆ մուտքի վիզաներ տրամադրել Ռուսաստանի քաղաքացիներին, եթե վերջիններս դիմեն Վրաստանում ԱՄՆ դեսպանություն:
Ամերիկյան դեսպանատանը պարզաբանել են՝ երրորդ երկրների քաղաքացիներին վիզաների տրամադրումը սովորական աշխատանքային գործընթաց է: Ընդ որում՝ նշվում է, որ ինչպես Վրաստանի, այնպես էլ Ռուսաստանի քաղաքացիները մուտքի վիզան կարող են ստանալ ութ օրվա ընթացքում: Դիտորդները նկատում են, որ այս հնարավորությունը հետաքրքիր կարող է լինել ՌԴ Հյուսիսային Կովկասի տարածաշրջանի, Կրասնոդարի և Ստավրոպոլի երկրամասերի բնակիչների համար:
Ի դեպ նշենք, որ այսօր «Ազատությանը» տված հարցազրույցում ՀՀ-ում ԱՄՆ դեսպան Ռիչարդ Միլզը հայտարարեց՝ Ռուսաստանի քաղաքացիները կարող են ԱՄՆ մուտքի վիզա ստանալ աշխարհի այլ երկրների դեսպանատներում, այդ թվում՝ Երևանում:
Մանրամասներին կարող եք ծանոթանալ՝ «Ազատություն» ռ/կ-ի կայքում:
