Թայփեյում ընթացող 29-րդ Համաշխարհային ամառային ուսանողական խաղերին Հայաստանից մասնակցեց երեք ծանրորդ եւ բոլորն էլ մեդալ նվաճեցին: Սիմոն Մարտիրոսյանն ու Գոռ Մինասյանը դարձան չեմպիոն, իսկ Անդրանիկ Կարապետյանը ծանր վնասվածքից հետո առաջին անգամ մասնակցելով պաշտոնական մրցման՝ արծաթե մեդալ նվաճեց:
Այսօր մեր ծանրորդները Թայվանից վերադարձան Հայաստան: «Զվարթնոց» օդանավակայանում Հայաստանի ծանրամարտի ֆեդերացիայի գլխավոր քարտուղար, Հայաստանի ազգային հավաքականի գլխավոր մարզիչ Փաշիկ Ալավերդյանը «Առավոտի» հետ զրույցում ամփոփեց մեր ազգային հավաքականի անդամների մրցելույթները:
«Բոլոր տղաներն էլ գերազանց հանդես եկան: Մեկնելուց առաջ ասել էի, որ դատարկաձեռն չենք վերադառնա Թայվանից ու ամեն բան լավ կլինի: Ու այդպես էլ եղավ: Շատ գոհ եմ հատկապես Անդրանիկ Կարապետյանից: Ծանր վնասվածքից հետո նրա այս մրցելույթից շատ բան էր կախված լինելու: Եվ նա փառքով դուրս եկավ: Այնպիսի կիլոգրամներ բարձրացրեց, որ անգամ ես, թեկուզ հավատում էի, բայց լիովին վստահ չէի: Անդրանիկի մրցելույթից հետո ես ուրախությունից թաքուն արտասվում էի:
Սիմոն Մարտիրոսյանն ու Գոռ Մինասյանը բարձրացրին այնքան, որքան անհրաժեշտ էր հաղթելու համար: Մենք այդպես էինք պլանավորել, քանի որ առջեւում Եվրոպայի երիտասարդական եւ աշխարհի մեծահասակների առաջնություններն են: Տղաները ցույց տվեցին իրենց կարողությունների մի մասը միայն: Ինձ միջակ ծանրորդներ պետք չեն»:
Աշոտ ՀԱԿՈԲՅԱՆ
