Երեկ Գյումրու «Իմպերիալ» ռեստորանում Ազգային ժողովի նախկին պատգամավոր Մարտուն Գրիգորյանի ավագ որդու՝ 18-ամյա Կամոյի հարսանիքին, որին մասնակցել է նաև երկրի նախագահ Սերժ Սարգսյանը, հրավիրված են եղել ԲՀԿ-ից հեռացած գրեթե բոլոր նախկին ԱԺ պատգամավորները։ Մարտուն Գրիգորյանը նախքան հարսանիքը Aravot.am-ի հետ զրույցում ասել էր, որ հրավիրելու է իր բոլոր ընկերներին՝ ԱԺ թե՛ ներկա, թե՛ նախկին պատգամավորների։
Ներկա են եղել մի քանի այսպես ասած «ապստամբ» ԲՀԿ-ականներ, որոնք ԱԺ ընտրություններից հետո հայտնվեցին «Ծառուկյան դաշինքի» շուրջ ստեղծված մանդատային սկանդալի մեջ, նրանց հարկադրում էին մանդատից հրաժարվելու դիմումներ գրել։ Նրանցից մեկը Կարամելի Հարութն էր՝ Հարություն Կարագյոզյանը, որը թեև ԱԺ ընտրություններում պատգամավոր ընտրվեց «Ծառուկյան դաշինքով», սակայն չհասցրեց ոտք դնել խորհրդարան․ Արա Բաբլոյանը հենց առաջին օրը ընթերցեց նրա՝ մանդատից հրաժարվելու դիմումը։ Հյուրերի թվում է եղել նաև Չերիի Վահանը՝ Վահան Կարապետյանը, որը նույնպես «Ծառուկյան» դաշինքի» վարկանիշային թեկնածուներից մեկն էր։ Ընթերցողները նրան կհիշեն ընտրարշավի ժամանակ դաժան ծեծի ենթարկվելու պատմությամբ։
Վերջինս ԱԺ ընտրություններից հետո ևս ԿԸՀ ինքնաբացարկի դիմում ներկայացրեց, այնուհետ ըմբոստացավ ու հետ վերցրեց դիմումը։ Իհարկե, վերջին հաշվով նա չհայտնվեց խորհրդարանում։ Հրավիրված է եղել նաև ապարանցի Լյովա Խաչատրյանը, որը նույնպես վերջին ԱԺ ընտրություններում առաջադրվեց «Ծառուկյան դաշինքով», սակայն մանդատից դարձյալ հրաժարման դիմում ներկայացրեց։
Գյումրիում քեֆ-ուրախության են մասնակցել նաև ԲՀԿ-ից ՀՀԿ տեղափոխված ու պատգամավոր չընտրված Բազմասեր Առաքելյանն ու Մուշեղ Պետոյանը։ Հարսանքավորների մեջ եղել է նաև եղել նաև ԲՀԿ-ական նախկին պատգամավոր, ազատամարտիկ Ռուստամ Գասպարյանը։
Մի խոսքով, երբեմնի ակտիվ ԲՀԿ-ականները մի մարդու պես մասնակցել են իրենց նախկին կուսակից ընկերոջ որդու հարսանիքին։
ՀՀԿ-ականներից մասնակցել են երկրի նախագահ Սերժ Սարգսյանը, ՀՀԿ ԱԺ խմբակցության ղեկավար Վահրամ Բաղդասարյանն ու ՀՀԿ վարկանիշային ցուցակով ընտրված անկուսակցական, գեներալ Ֆելիքս Ցոլակյանը, Վանաձորի ՀՀԿ-ական քաղաքապետ Մամիկոն Ասլանյանը, Գեղարքունիքի ՀՀԿ-ական մարզպետ Կարեն Բոթոյանը, ՀՀԿ-ի կողմից առաջադրված Գյումրու քաղաքապետ Սամվել Բալասանյանը։ Միակ դաշնակցականը եղել է Շիրակ մարզպետը՝ Արթուր Խաչատրյանը։
Նունե ԱՐԵՎՇԱՏՅԱՆ
