«Սեֆիլյանի շահերի համար սա լավագույն նվերն էր, որ մենք կարող էինք ունենալ եվրոպական դատարանի դիմելու համար». փաստաբան

«Սեֆիլյանի շահերի համար սա լավագույն նվերն էր, որ մենք կարող էինք ունենալ եվրոպական դատարանի դիմելու համար». փաստաբան

Ժիրայր Սեֆիլյանի պաշտպան Տիգրան Հայրապետյանը չի մեղադրում իր պաշտպանյալի գործով ներգրավված հանրային պաշտպանին, որ չի հրաժարվում դատարան ներկայանալուց:

«Տպավորություն ունեմ՝ դատավորը չի հասկանում ինչ է կատարվում, ասում է՝ արդյունավետ պաշտպանություն պետք է իրականացնենք, մինչդեռ դատավորը գիտի՝ հանրային պաշտպանը չի հանդիպել Ժիրայր Սեֆիլյանի հետ, լիազորված չէ նրա կողմից պաշտպանություն իրականացնել, բայց նման պայմաններում դատավորը պարտադրում է՝ փաստաբանը պաշտպանություն իրականացնի, սա ծիծաղելի է: Ինչ կարող էր անել տվյալ դեպքում հանրային պաշտպանը՝ կամ պետք է նստեր, կամ պետք դուրս գար նիստերի դահլիճից, երկու դեպքում էլ որեւէ բան չէր փոխվելու, եթե դուրս գար, կստանար կարգապահական դիմում, մի ուրիշը կլիներ նրա փոխարեն»,- ասաց Տիգրան Հայրապետյանը:

Հիշեցնենք, որ քաղաքացիական ակտիվիստ Վարդգես Գասպարին բողոքի ցույց է անցկացրել Սեֆիլյանի հանրային պաշտպան Մարինե Թովմասյանի տան դիմաց, որ վերջինս չի հրաժարվում դատարան գալուց:

Անդրադառնալով քննադատությանը, որ Մարինե Թովմասյանը դատարան գալով՝ նպաստում է, որ Սեֆիլյանը դատվի՝ առանց պաշտպանության՝ Տիգրան Հայրապետյանն ասաց. «Ինքը դատարանում հայտարարել է՝ ես պաշտպան չեմ, այս դեպքում դատավորը չպետք է իրեն պաշտպան նշանակի, բայց դատավորն ասում է՝ ոչինչ նստի, բայց պաշտպանություն մի իրականացրու: Ժիրայր Սեֆիլյանի շահերի համար սա լավագույն նվերն էր, որ մենք կարող էինք ունենալ եվրոպական դատարանի դիմելու համար»:

Արփինե ՍԻՄՈՆՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք