2015թ. Նորք Մարաշում վնասազերծված` Արթուր Վարդանյանի ղեկավարած «զինված խմբի գործով» հերթական դատական նիստին այսօր ներկայացել էր նաեւ մեկ այլ վկա՝ Սրբուհի Այվազյանը, որը եւս այս գործից անջատված մասով մեղադրյալ է հանդիսանում: Նա ասաց, որ հրաժարվում է ցուցմունք տալ եւ կողմերի հարցերին պատասխանել, ուստի մեղադրող դատախազները հրապարակեցին նրա նախաքննական ցուցմունքը:
Համաձայն դրա՝ աղջիկն Արթուր Վարդանյանի հետ ծանոթացել է սոցիալական ցանցով, որի միջոցով իր հոր հեղինակային գրքի վաճառն էր իրականացնում: Այնուհետեւ Վարդանյանի «Հայոց վահան» կազմակերպության համար համակարգչային ծրագրով նկարել է զինանշան:
Սրբուհի Այվազյանը եւս տեղեկություններ չուներ այն մասին, որ Արթուր Վարդանյանն ու իր համախոհները հանցավոր մտադրություններ են ունեցել:
Սրբուհի Այվազյանի ցուցմունքում նաեւ ասված է, որ ինքը Արթուր Վարդանյանի խնդրանքով համացանցում փնտրել է ՀՀ պաշտոնյաների, օլիգարխների, նրանց սիրուհիների եւ ունեցվածքի մասին տեղեկություններ ու մամուլի հրապարակումնեը, եւ դրանք ուղարկել Արթուր Վարդանյանին: «Արթուր Վարդանյանը նաեւ հետաքրքրվում էր Վանո Սիրադեղյանի մասին տեղեկություններով»,-ասել է Սրբուհի Այվազյանն իր նախաքննական ցուցմունքում:
Լուիզա ՍՈՒՔԻԱՍՅԱՆ
