Եվրախորհրդարանի Իրավական հարցերով կոմիտեն այսօր ընդունված զեկույցում մտահոգություն է հայտնել Ադրբեջանում մարդու իրավունքների խախտումների և արդարադատության ոլորտում թերացումների վերաբերյալ:
Զեկույցի նախաձեռնությունը պատկանում է պատգամավոր Ալեն Դեստեքսին, այն ընդունվել է միաձայն:
Կոմիտեն, մասնավորապես, իր մտահոգությունն է հայտնել ոչ կառավարական կազմակերպությունների առաջնորդների, մարդու իրավունքների պաշտպանների, լրագրողների, քաղաքական ակտիվիստների, բլոգերների և իրավաբանների հետապնդումների վերաբերյալ:
Զեկույցում նշվում է, որ անհանգստության տեղիք է տալիս նաև Ադրբեջանի կառավարության կողմից 2012-2014թթ. ընթացքում խոշոր գումարների լվացման վերաբերյալ հայտարարությունները՝ կոչ անելով երկրի իշխանություններին անհապաղ սկսել անկախ, անկողմնակալ քննություն այդ մեղադրանքների հարցում՝ համագործակցելով միջազգային մարմինների հետ:
Խորհրդարանականները նաև անհանգստացած են Մարդու իրավունքների եվրոպական դատարանի բացահայտած դեպքերի առնչությամբ՝ կապված «ձերբակալությունների ժամանակ, ոստիկանական բաժանմունքներում և բանտերում անմարդկային և նվաստացուցիչ վերաբերմունքի և խոշտանգումների, արդյունավետ քննության բացակայության, արդար դատավարության իրավունքի, խոսքի ազատության և ազատ հավաքների իրավունքի խախտումների հետ»:
Չնայած Ադրբեջանի արդարադատության համակարգում կատարված որոշ բարեփոխումներին՝ Իրավական հարցերի կոմիտեին մտահոգում են Ադրբեջանում քրեական օրենքի կամայական կիրառության մասին պնդումները, դատավորների կողմից կալանքի՝ որպես խափանման միջոցի կիրառման չարաշահումը և պաշտպանվելու իրավունքի հետ կապված խնդիրները:
Կոմիտեն նաև նշում է, որ քիչ առաջընթաց է գրանցվել ՄԻԵԴ-ի վճիռները կատարելու ուղղությամբ. ավելի քան 120 վճիռ լիարժեք չի իրականացվել: Հետևաբար Կոմիտեն կոչ է անում կատարել այդ վճիռները և հնարավորինս արագ ազատ արձակել Իլգար Մամեդովին:
Բանաձևի նախագիծը կքննարկվի հոկտեմբերի 11-ի նիստին:
Պատրաստեց՝ Վիկտորյա ԱՆԴՐԵԱՍՅԱՆԸ
