«Կինոպարկ» կինոթատրոնում այսօր հանդիսատեսի դատին հանձնվեց կինոռեժիսոր, դերասան Ֆիլիպ Պողոսյանի «Իմ անցյալի դիմանկարը» խաղարկային-լիամետրաժ ֆիլմը, որը հիմնված է իրական պատմության վրա: Այն ֆիլմ դարձնելու գաղափարը ծնվել է, երբ նկարիչ Դավիթ Կիրակոսյանը հանդիպել է Ֆիլիպ Պողոսյանին, որն էլ կյանքի է կոչել նրա պատմությունը:
«Ֆիլմը մի նկարչի մասին է, որն ապրում է կանանց գրավելով:
Նա հեշտությամբ կարողանում է, օրինակ, փողոցում ծանոթանալ աղջիկների հետ եւ իրենով անել նրանց՝ մեկ գիշերով: Ի դեպ, ֆիլմը 18+ է:
Նա սիրահարվում է Մարիային եւ հասկանում, որ աղջիկներին գրավելու իր հմտությունները չեն օգնում: Այսինքն, սիրո մեջ, եթե կոպիտ արտահայտվենք, մի գիշերվա կյանքը չի օգնում: Զուգահեռ, նա հիշում է նախկին սիրուն՝ Անահիտին եւ հասկանում, որ նույն կերպ կորցնում է նաեւ Մարիային»,-Aravot.am-ի հետ զրույցում պատմեց Ֆիլիպ Պողոսյանը:
Թե ինչպես է պատմությունը վերջանում, ռեժիսորը փակագծերը չի բացում. «Կարող եմ ասել, որ հերոսն իր անհաջողություններն ու դժբախտությունները վերափոխում է հաջողության: Իհարկե, ֆիլմում մի գիշերվա կյանքը չի խրախուսվում: Վերջում հերոսը փոխվում է»:
«Իմ անցյալի դիմանկարն» առաջիկայում կցուցադրվի Երեւանյան կինոթատրոններում: Նախատեսվում է ցուցադրություն կազմակերպել Ղազախստանում, ինչից հետո ֆիլմը գուցե փառատոնների մասնակցի:
Լուիզա ՍՈՒՔԻԱՍՅԱՆ
