«Գյումրին առանց տնակների» հիմնադրամը, որի հոգաբարձուների խորհրդի նախագահը Շիրակի թեմի առաջնորդ Միքայել եպիսկոպոս Աջապահյանն է և որի նպատակը գյումրեցիներին անօթևանության ճիրաններից փրկելն է, ԱԺ ընտրությունների քարոզարշավի ժամանակ հանդես գալով «Մեկ կուսակցություն-մեկ բնակարան» նախաձեռնությամբ, դիմել էր ընտրություններին մասնակցող կուսակցություններին։
Հիմնադրամի նախաձեռնությանը արձագանքել էին կոալիցիոն երկու գործընկերները՝ ՀՀԿ-ն ու ՀՅԴ-ն։ Վերջերս ՀՀԿ-ն կատարեց իր խոստումը․ գրեթե երկու առանձնատան հարց լուծեց գյումրեցի երկու անօթևան ընտանիքի համար։ Ինչպես պարզաբանեց Սամվել Նիկոյանը, նախընտրական քարոզարշավի ժամանակ խնայողություններ էին արել, որպեսզի գումարը ուղղեն անօթևաններին տներով ապահովելուն։
Իսկ ՀՀԿ-ի կոալիցիոն գործընկեր ՀՅԴ-ն, որը փաստացի պատասխանատու է Շիրակի մարզի կառավարման, սոցիալ-տնտեսական իրավիճակի համար․ մարզպետը դաշնակցական է, մինչև օրս չի կատարել իր խոստումը։
Այս մասին Aravot.am-ի հետ զրույցում տեղեկացրեց «Գյումրին առանց տնակների» հիմնադրամի գործադիր տնօրեն Ղարիբ Հարությունյանը։
Թե ի՞նչ են պատճառաբանում դաշնակցականներն այս մասին` վաղվա «Առավոտ» օրաթերթում։
Նունե ԱՐԵՎՇԱՏՅԱՆ
