Մոսկվայում այսօր տեղի է ունեցել հանդիպում Ն.Ս.Օ.Տ.Տ. Գարեգին Բ-ի, համայն Ռուսիո պատրիարք Կիրիլի և Ադրբեջանի հոգևոր առաջնորդ Ալլահշուքյուր Փաշազադեի միջև:
Երեք երկրների հոգևոր առաջնորդները կոչ են արել ազատ արձակել խաղաղ բնակիչներին, որոնք պահվում են որպես ռազմագերի, ինչպես նաև թույլ չտալ բարբարոսական գործողությունների երկու կողմերում գտնվող եկեղեցիների և մզկիթների հանդեպ:
«Որոշակի գործողությունները արդյունքում տուժում են մարդիկ, այդ թվում խաղաղ բնակիչներ, որոնք այս կամ այն կողմի մոտ գերի են ընկնում: Եվ որոնք չեն մասնակցել որևէ ռազմական գործողության, իսկ հիմա պահվում են որպես ռազմագերի: Մենք կոչ ենք արել ազատ արձակել խաղաղ բնակիչներին: Չի կարելի ռազմագերիների պահման մասին ռազմական գործողությունների կանոնները տարածել այն մարդկանց վրա, որոնք ռազմագերի չեն»,- ասել է Ռուսաստանը հոգևոր առաջնորդը:
Պատրիարքը հույս է հայտնել, որ այս հանդիպումն իր ներդրումը կունենա Արցախի հակամարտության կարգավորման գործում:
«Մենք այսօր կշարունակենք մեր համատեղ մտորումները Լեռնային Ղարաբաղում և դրա շուրջ տիրող իրավիճակի վերաբերյալ: Միանգամայն ակնհայտն է, որ առկա խնդիրները գտնվում են ոչ բավարար վիճակում, և միաժամանակ, և՛ Ադրբեջանի, և՛ Հայաստանի ժողովուրդները ցանկություն ունեն առաջ գնալ, որպեսզի խաղաղությունը դառնա ավելի ամուր և արդար»,- ասել է նա:
Իր հերթին Փաշազադեն հայտարարել է, որ Հայաստանի և Ադրբեջանի երիտասարդությանը պետք է դաստիարակել այն գիտակցմամբ, որ նրանք հարևաններ են և ապրելու են կողք կողքի:
«Մենք չպետք է հանդիպենք հանդիպելու համար: Մենք պետք է հանդիպենք, որպեսզի հնարավորություն ունենանք դիմել մեր երկրների ղեկավարություններին, որպեսզի նրանք անեն ամեն բան՝ հակամարտությունը կանխելու համար: Որպեսզի մեր երիտասարդությունը մեծանա այն ոգով, որ իրենք հավերժ հարևաններ են լինելու: Ո՛չ Հայաստանը, ո՛չ Ադրբեջանը չեն հեռանա այդ տարածքներից, այսինքն` նրանք պետք է ապրեն կողք կողքի, և երիտասարդությունը պետք է դաստիարակվի այդ ոգով»,- ասել է Փաշազադեն:
Պատրաստեց՝ Վիկտորյա ԱՆԴՐԵԱՍՅԱՆԸ
