Բաղրամյան 67/1 հասցեում սեպտեմբերի 9-ին կայացավ Հայաստանի Բրիտանական միջազգային դպրոցի (BISA) բացման արարողությունը: Դպրոցը լրացուցիչ կրթություն է ապահովում հանրակրթական դպրոցին զուգահեռ: Երկու տարվա ուսումնասիրությունից հետո շրջանավարտները ստանում են Edexcel international advanced level որակավորում, որը հնարավորություն է տալիս եվրոպական եւ բրիտանական համալսարաններ ընդունվել առանց հավելյալ քննությունների:
Բրիտանական միջազգային դպրոցի ակադեմիական տնօրեն Աշոտ Աբրահամյանը նշեց, որ երկու տարվա աշխատանքից հետո, վերջապես, սկսում են ուսուցումը բրիտանական կրթական ծրագրերով: «Այն ընթացքը, որ երկու տարվա ընթացքում կունենան մեր սովորողները, կլինի բավականին հետաքրքիր, բայց նաեւ դժվար, որովհետեւ ուսուցումը մեզ մոտ տարբերվելու է հանրակրթական ծրագրերից: Մյուս կողմից, դա նաեւ հնարավորություն է տալու համալսարանական կրթություն ստանալ դրսում»,- նշեց ակադեմիական տնօրենը: Կրթությունը բրիտանական միջազգային դպրոցում երկու տարի է, ուսման վարձը՝ 900 000 դրամ:
Գոհար ՀԱԿՈԲՅԱՆ