«Առեւտրային բանկերի եւ ֆինանսական կազմակերպությունների կողմից տրամադրվող վարկերի բարձր տոկոսադրույքները լուրջ խոչընդոտ են հանդիսանում գյուղատնտեսությունում բազմաթիվ տնտեսավարողների գործունեության համար»,-կառավարության հինգշաբթի օրվա նիստում այս մասին կհայտարարի գյուղատնտեսության նախարար Իգնատի Առաքելյանը: Գյուղնախարարը վարչապետ Կարեն Կարապետյանին կառաջարկի հավանություն տալ Գյուղատնտեսության ոլորտին տրամադրվող վարկերի տոկոսադրույքների սուբսիդավորման ծրագրին: Ըստ Իգնատի Առաքելյանի,
ներկայումս գյուղատնտեսության զարգացմանը խոչընդոտում են մի շարք գործոններ` գյուղատնտեսության վարման բարձր ռիսկայնությունը, գյուղացիական տնտեսությունների փոքր չափերը եւ հողաբաժինների մասնատվածությունը, խոշոր ապրանքային տնտեսությունների ցածր տեսակարար կշիռը, գյուղատնտեսությունում տնտեսավարողների համատեղ գործունեության ոչ բավարար ընթացքը, արտադրական եւ շուկայական (ենթակառուցվածքների թերզարգացվածությունը. «Նշվածի հետ մեկտեղ գյուղատնտեսության առջեւ ծառացած խնդիրներից է նաեւ տնտեսավարողների վարկավորման մատչելիության ցածր մակարդակը:
Առևտրային բանկերի կողմից հիմնականում տրամադրվող վարկերի բարձր տոկոսադրույքների պատճառով դրանք գրեթե անմատչելի են արտադրատեխնիկական բարդ պայմաններ եւ իրացման դժվարություններ ունեցող բազմաթիվ տնտեսավարողների համար, ուստի պետական հովանավորչական քաղաքականության իրականացումն անհրաժեշտ պայման է հանդիսանում գյուղատնտեսությունում տնտեսավարողների կարողությունների հզորացման, արտադրության ծավալների ընդլայնման եւ գյուղատնտեսական արտադրության մրցունակության բարձրացման համար։ Դրա հետ մեկտեղ կարեւորագույն խնդիր է վարկերի նպատակայնության մակարդակի բարձրացումը, վարկերի գումարի եւ վարկավորման ժամկետների ավելացման միջոցով դրանց նպատակաուղղումը տնտեսությունների խոշորացմանը, արդիական տեխնոլոգիաների ներդրմանը եւ տնտեսավարողների գիտելիքների մակարդակի բարձրացմանը»:
Նախարարը համոզված է, որ այս խնդիրները լուծելու համար
անհրաժեշտ է գյուղատնտեսությունում տնտեսավարողների վարկավորման մատչելիությունը բարձրացնել եւ վարկավորման պայմանները բարելավել:
«Գյուղատնտեսական մթերքների արտադրության, մթերման, վերամշակման, գյուղատնտեսական աշխատանքների նախապատրաստման, արտադրական կարողությունների ընդլայնման, նոր արդիական տեխնոլոգիաների կիրառման համար գյուղատնտեսությունում տնտեսավարողներին խիստ անհրաժեշտ է ունենալ բավարար հիմնական եւ շրջանառու միջոցներ»,-նկատում է գյուղնախարարը: Ըստ նրա, ոլորտին տրամադրվող վարկերի մատչելիության բարձրացման ներկայիս գործող ծրագրերում կիրառվող մեխանիզմները եւ պայմանները հնարավորություն են տալիս լուծելու միայն գյուղատնտեսությունում տնտեսավարողների ընթացիկ խնդիրներ:
Լուսինե ԲՈՒԴԱՂՅԱՆ
