Դավիթ Հարությունյանը հայտարարեց՝ ստալինյան բռնաճնշումների ցուցահանդեսին լայն տարածում են տալու եւ դրանով կանգ չեն առնելու

Դավիթ Հարությունյանը հայտարարեց՝ ստալինյան բռնաճնշումների ցուցահանդեսին լայն տարածում են տալու եւ դրանով կանգ չեն առնելու

Օրերս մշակույթի նախարարության ուղիղ հրահանգով եւ ցուցումով փակվել է Հովհաննես Թումանյանի տուն-թանգարանի բացած մի ցուցահանդես, որը նվիրված էր խորհրդային տարիներին ստալինյան բռնաճնշումներին, քաղաքական հետապնդումներին, որի զոհ են գնացել 1920-53 թթ 45 հազար մարդ, այդ թվում՝ Գարեգին Նժդեհը, որը իշխող կուսակցության գաղափարախոսն է:

Այսօր ԱԺ-կառավարություն հարցուպատասխանի ժամանակ «Ելք» խմբակցության պատգամավոր Արարատ Միրզոյանը այդ մասին հարց ուղղեց կառավարությանը՝ «Ո՞վ է կայացրել այդ որոշումը՝ մշակույթի փոխնախարարը, վարչապետը, նախարարը, այդ որոշումը կայացվել է որեւէ հատուկ ծառայության խորհրդի հիման վրա, որովհետեւ թանգարանի տնօրենը սպառնալից զանգ է ստացել 20-ականների ոճով, մի գեներալ ասել է ՝տիկին, դուք դաշնակցական պրոպագանդա եք անում»:

Արարատ Միրզոյանը առաջարկեց կառավարությանը անմիջապես, առանց որեւէ շտկումների բացել այդ ցուցահանդեսը եւ կառավարության շենքում սրահ հատկացնել, որպեսզի այդ ցուցահանդեսին կարողանան ծանոթանալ նաեւ կառավարության աշխատակիցները՝ նախարարներն ու փոխնախարարները:

Արդարադատության նախարար Դավիթ Հարությունյանը պատասխանեց, որ բոլորն էլ գիտեն, թե ինչ դիրքորոշում ունի Հայաստանը՝ լենինյան, ստալինյան բռնապետության ժամանակաշրջանի հետ կապված. «Այս տարի լրանում է հոկտեմբերյան հեղափոխության հարյուրամյակը, որից հետո սկիզբ դրվեց լուրջ, լայնածավալ մարդու իրավունքների խախտումներին ՀՀ-ում, որոնք իրենց գագաթնակետին հասան 37 թվին:

Մենք այսօր պետք է անդրադառնանք այդ տխուր տարեթվի 80-ամյակին: Գնահատականը այդ իրադարձություններին տրված է պետական մակարդակով: Դպրոցներում՝ դասագրքերում թե՛ համաշխարհային պատմության, թե՛ հայ գրականության, մենք հստակ գնահատական ենք տալիս այդ ժամանակահատվածին: Այդ ժամանակահատվածի գնահատականը արտացոլվում է նաեւ նրանում, որ պատրաստվում ենք կառուցել Հիշատակի թանգարան: Փորձել քաղաքականացնել ընդամենը պետական գերատեսչության եւ ՊՈԱԿ-ի համատեղ աշխատանքը, ես կարծում եմ, անտեղի է: Դիրքորոշումը պարզ է, որեւէ փոփոխություն տեղի չի ունեցել այդտեղ»:

Դավիթ Հարությունյանը հորդորեց քաղաքական ենթատեքստ այդտեղ չորոնել. «Ինչ վերաբերում է Հովհաննես Թումանյանի 4 որդիներից 3-ին, որոնք դարձան այդ բռնապետության զոհը, պիտի ասեմ, որ ցուցահանդեսը 22 օր գործել է: Աշխատանքային եւ վարչական հարաբերությունները քաղաքականացնելը անիմաստ է, ուղղակի ցավում եմ, որ նման դեպք տեղի ունեցավ»:

Հիշեցնենք, որ մշակույթի փոխնախարար Արեւ Սամուելյանը հայտարարել էր, որ ցուցահանդեսը քաղաքականացված էր, դրա համար փակել են:

Դավիթ Հարությունյանը հայտարարեց, որ ընդհակառակը՝ ցուցահանդեսը պետք է ավելի լայն տարածման հնարավորություն ունենա. «Մենք կանգ չենք առնելու, այս տարի հիշատակի 80-ամյակն է եւ շատ ավելի լայնածավալ միջոցառումներ ենք կազմակերպելու»:

Հռիփսիմե ՋԵԲԵՋՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք