Հայկական հին բաղադրատոմսով է պատրաստվում Վանի օշարակը, որը բավական հաջող բուժիչ ազդեցություն ունի՝ անցկացնում է գլխացավերն ու անքնությունը, ընդհանուր թուլությունը, կարգավորում է արյան ճնշումը:
Այս օշարակը պատրաստելու համար անհրաժեշտ է 300 գրամ քաղցրահամ խնձոր, 200 գրամ թարմ հոն, 20 գրամ չորացրած խնկածաղիկ, 30 գրամ նռան հատիկներ, 50 գրամ շաքարավազ եւ 5 գրամ քերած մշկընկույզ:
Պատրաստման եղանակը: Խնձորը լավ լվանալ, կորիզահան անել, կտրատել եւ լցնել արդեն եռացող 2 լիտր ջրի մեջ, ավելացնել թարմ հոնը, նռան հատիկները, մշկընկույզը: Մոտ 20 րոպե եռալուց հետո օշարակի մեջ լցնել խնկածաղիկն ու շաքարավազը, թողնել եւս 15 րոպե: Այնուհետեւ հատուկ մանրաքամիչով քամել եւ լցնել ապակե տարաների մեջ, որպեսզի սառչի:
Մատուցել սառը վիճակում:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
13.09.2017
