Ավան եւ Նոր Նորք վարչական շրջանների ընդհանուր իրավասության դատարանում այսօր 2016թ. ոստիկանության ՊՊԾ գունդը գրաված եւ ծանր հանցագործությունների մեջ մեղադրվող «Սասնա ծռեր» խմբի անդամներից 18-ի գործով դատական նիստից առաջ ամբաստանյալների պաշտպաններից փաստաբան Նինա Կարապետյանցը եւս ներս չմտավ՝ զննության ժամանակ հրաժարվելով բացել պայուսակը:
Aravot.am-ի հետ զրույցում Նինա Կարապետյանցն ասաց. «Բնականաբար, ամեն անգամ զննություն եմ անցել, բայց երբ սկսվեց փաստացի խուզարկությունը, կրկին հրաժարվեցի դրանից: Ի սկզբանե ասել եմ, որ պայուսակումս արգելված իր չկա: Ակնհայտ է՝ կան փաստաբաններ, որոնց չեն ուզում ներս թողնել»:
Փաստաբանը կատարվածի մասին գրություն թողեց դատավորին: Նշեց, որ դրանում բացատրել է՝ արգելված իրեր չունի, բացառությամբ բակտերիաների: «Դրանք իմ օրգանիզմի անբաժան մասն են, չեմ կարող հանել-դնել պահարանում, ինչպես իրենք են պահանջում»,-հեգնեց փաստաբանը:
Հիշեցնենք, որ օրերս դատարանների նախագահների խորհրդի սահմանած՝ արգելված իրերի ցանկում կան նաեւ վիրուսներ ու բակտերիաներ:
Լուիզա ՍՈՒՔԻԱՍՅԱՆ
