Իրաքում Քուրդիստանի ինքնավարության կառավարության որոշմամբ սեպտեմբերի 25-ին անկախության հանրաքվե է նախատեսված, այս առիթով շատերի մոտ Հայաստանում ոգեւորություն է նկատվում, սակայն արդյոք վտանգներ չկա՞ն, հարցրեցինք Միջազգային եւ անվտանգության հարցերի հայկական ինստիտուտի ասոցացված փորձագետ Գեւորգ Մելիքյանին:
«Անհասկանալի է Հայաստանում շատերի, այդ թվում եւ իմ գործընկերներից շատերի անթաքույց ոգեւորությունն այս առիթով: Այստեղ չի կարող աշխատել «այն, ինչ դեմ է Թուրքիային, ուրեմն լավ է Հայաստանի համար» տրամաբանությունը, կամ էլ, որ այս հանրաքվեն կարող է դրական ձեւով անդրադառնալ ԼՂ անկախության ճանաչման գործընթացի վրա: Արտաքին կոշտ քաղաքականության մեջ պետք է փոխել մոտեցումները՝ ըստ հանգամանքների եւ մաքսիմալ օգուտ քաղելու անհրաժեշտության:
Քրդստանի ստեղծումը, հնարավոր ռազմական գործողությունները, փախստականների ալիքը՝ այդ թվում նաեւ՝ դեպի ՀՀ, եւ այլն, շատ վտանգավոր են մի շարք առումներով, մանավանդ, որ քրդերի հեռահար տեսլականը ենթադրում է նաեւ Մեծ Քրդստանի ստեղծումը, որը ներառում է նաեւ Արեւմտյան Հայաստանի մեծ մասը: Քրդական հարցը միշտ հակասել եւ հակասում է Հայաստանի շահերին, եւ քրդերին աջակցելը որեւէ ձեւով եւ կերպ կարող է առաջացնել անվտանգային խնդիրներ Հայաստանի համար: Գիտեմ, որ շատերը կարող են չհամաձայնել այս մոտեցման հետ, սակայն ավելի խորն ուսումնասիրությունները ցույց են տալիս, որ քրդերի հետ անթաքույց համագործակցելը չի բխում Հայաստանի եւ հայերի շահերից: Հուսով եմ, որ շատերը չեն մոռացել նաեւ քրդերի խիստ բացասական դերակատարությունը Հայոց Ցեղասպանության տարիներին», նկատեց մեր զրուցակիցը:
Միջազգային եւ անվտանգության հարցերի հայկական ինստիտուտի ասոցացված փորձագետ Գեւորգ Մելիքյանի հետ զրույցի մանրամասները կարդացեք սեպտեմբերի 19-ի տպագիր «Առավոտ»-ում:
ԷՄՄԱ ԳԱԲՐԻԵԼՅԱՆ
Վերջապես՝ մի սթափ գնահատական քրդական անջատողականությանը: