Այսօր հրավիրված Վանաձորի համայնքի ավագանու նիստից հետո, ավագանու անդամ Գայանե Քալանթարյանը հետաքրքրվեց, թե այն ավագանու անդամներն ովքեր երկար ժամանակ բացակայել են նիստերից, արդյո՞ք պետք է շարունակեն ավագանու կազմում մնալ. «Հետաքրքիր է, թե ինչպիսի՞ կարծիք ունի մեր իրավաբանական բաժինը»:
Տիկին Քալանթարյանի բարձրացրած հարցին պարզաբանում տվեց քաղաքապետ Մամիկոն Ասլանյանը. «Քանի որ մեր ավագանու մի մասի կեցվածքը եւ գործողություններն էս պահին իրավաբանական դաշտում են, մենք չենք անդրադառնում, մինչեւ սահմանադրական դատարանը որոշում կայացնի: Հետագայում, անպայման անդրադառնալու ենք, որովհետեւ Վանաձորի ավագանին շատ պատվաբեր, կարեւոր ու պատասխանատու ինստիտուտ է, եւ այդ ինստիտուտը ոտնահարողը կարծում եմ չպետք է լինի ավագանու անդամ»:
Ավագանու անդամներից Վահագն Ավագյանին էլ հետաքրքրում էր քաղաքի աղբահանության հարցը: Նրա խոսքով, թեեւ աղբահանող կազմակերպությունը փոխվեց, սակայն իրավիճակը մնացել է գրեթե անփոփոխ. «Կոնկրետ մեր թաղամասի մասով ասեմ, որ կենցաղային աղբը նորից տարածքում թափվում է, մի խոսքով խայտառակ վիճակ է: Եթե մենք տենց մեծ փոփոխություններ արեցինք, խոստումներ եղան, որ կկարգավորվի: Հիմա ո՞նց պետք է էս հարցը լուծվի»:
«Հիմա մենք ընդհանուր աղբահանության գլոբալ խնդրի լուծման ճանապարհին ենք: Մեր աղբահանության մեծ ծրագիրը սկսելուն պես, ձեր ասած երեւույթն էլ չի լինելու, եւ արդեն մենք կորոշենք աղբահանությունն ինչ եղանակով կազմակերպենք: Իսկ մենք չունեինք այլ առաջարկություններ, այլ մրցակցություն, իսկ երբ-որ չկա մրցակցություն, ստիպված ես լինում կանգ առնել մեկ առաջարկության վրա: Ինչքան խնդիրներ կան, աշխատում ենք բաժնի հետ դրանց լուծումներ տալ: Երեւանում էլ, ցանկացած տեղ էլ այդ խնդիրները կան: Սկզբնական շրջանում որոշակի փոփոխություններ կային, բայց որ ասեմ լավ է, լավ չէ, ձեզ հետ համամիտ եմ»,-ասաց համայնքի ղեկավարը:
Տաթեւիկ ՂԱԶԱՐՅԱՆ
