Քաղաքական վերլուծաբան Ռուբեն Մեհրաբյանը վստահ է`Հայաստանի անկախությունն այլընտրանք չունի, թեեւ այն սուբյեկտը, որից անկախացել ենք, բոլոր ճակատներով գրոհում է մեր անկախության դեմ. «Իր ախոռը, որը կոչվում է իբր տնտեսական միություն, իր, ռուսական աշխարհ կոչվող փնթի գաղափարախոսությամբ, իրենց անընդունելի ապրելակերպով»:
Ռուբեն Մեհրաբյանն այսօր մասնակցում էր «Քաղաքացիական գիտակցություն» ազատական հասարակական կազմակերպության 4-րդ համաժողովին: Նա հաջողություն մաղթեց կազմակերպությանն իր գործունեության հետագա ընթացքում`նկատելով, որ կարեւոր առաքելություն ունեն անկախ Հայաստանի պահպանման եւ զարգացման գործում:
ԱԺ պատգամավոր, «Ելք» խմբակցության քարտուղար Գեւորգ Գորգիսյանն էլ իր ելույթում ՀՀ-ի անկախությանը հարատեւություն եւ անխափանություն մաղթեց, որպեսզի «մենք եւ մեր սերունդները երբեք կարիք չունենանք պայքարելու անկախության համար»:
Նրա կարծիքով՝ առկա հատուկենտ լուսավոր կետերը, որոնցից մեկն էլ «Քաղաքացիական գիտակցություն» կազմակերպությունն է, «լույս են սփռում ընդդեմ չիմացության խավարի, լույս, որը կարող է կերտել վաղվա Հայաստանը, ինչպիսին այն պատկերացնում էին անկախության համար պայքարող մարդիկ»:
Պատգամավորի կարծիքով, անցած 26 տարիների ընթացքում արժեքները խեղաթյուրվել են. «Երբ խոսում ենք եվրոպական արժեքներից, մարդիկ հասկանում են, որ ուզում ենք մեր տղաները լինեն հոմոսեքսուալ, աղջիկները`լեսբուհի: Բայց մենք եվրոպական, ազատական արժեք ասելով հասկանում ենք անկախ դատարաններ, ազատ շուկայական հարաբերություններ, հավասար հնարավորություններ եւ ազատություններ, համակարգեր, որոնց հիմքում մարդը լինի: Քանի դեռ կանք մենք, քանի դեռ կաք դուք`լույսը շատանալու է: Քանի կա լույսի մի ամբողջական կետ`խավարը տոտալ չէ եւ հույս կա, որ լույսը հաղթելու է»:
«Եվրոպական ուսումնասիրությունների կենտրոնի» տնօրեն Արթուր Ղազինյանն էլ նկատեց` վերջին 500 տարվա ընթացքում Հայաստանը երբեք 26 տարի անկախ չի եղել եւ չի ունեցել անկախության սերունդ: Նա վստահ է`անկախության շրջանում ձեւավորված մարդկանց գիտակցությունն ազատ է. «Այդ գիտակցությունը հնարավոր չէ փոխել: Համենայնդեպս, անկախ Հայաստանի գոյությամբ ոչ այդքան ուրախ կենտրոններից շատ ջանքեր է պահանջվելու: Անկախության սերունդը մտածում է ազատ: Այդ սերնդի առաքելությունն ու մանդատը շատ կարեւոր է: Դուք պետք է համոզեք բոլորին, որ անկախությունը, ինքնիշխանությունը առեւտրի առարկա չեն, դա այն ձեռքբերումն է, որն ունի Հայաստանը»:
Նելլի ԳՐԻԳՈՐՅԱՆ
