Այսօր Եռաբլուրում արձագանքելով արտգործնախարար Էդվարդ Նալբանդյանի՝ տարածքներ վերադարձնելու մասին հայտարարությանը՝ «Երկիր Ծիրանի» կուսակցության նախագահ Փոստանջյանն ասաց. «Մենք չունենք որեւիցե տարածք հանձնելու: Բանակցությունների ձեւաչափը չի կարող ընթանալ այն ձեւաչափով, որն ընթացել է այս 26 տարիների ընթացքում: Կա Արցախի եւ ՀՀ-ի հանրապետություն, մենք փաստացի մեկ միավոր ենք, եկել է այն պահը, որ դա պետք է իրավական ձեւակերպում ստանա եւ դրա ներքո մենք պետք է անցկացնենք մեր միասնական ընտրությունները: Արցախապատկան տարածքները ենթակա չեն սակարկման կամ հանձնման: Եթե խոսում ենք զիջումների կամ փոխզիջումների մասին, Նախիջեւանը, Գետաշենը, Շահումյանը, Ուտիքը այս պահին զիջված է, այդ ի՞նչն եք պատրաստվում նորից հանձնել: Դուք ինչպե՞ս եք պատկերացնում մեր հայրենիքի մի մասը, որը ցանկանում եք հանձնել, Տիգրանակե՞րտն եք ցանկանում հանձնել, որը մեր քաղաքական հայտն է, մոռացվածությունն է մեր երբեմնի հզորության մասին: Ձեզ որեւիցե մեկը թույլ չի տալու, որպեսզի նման դավաճանական գործողություն իրականացնեք»:
Զարուհի Փոստանջյանն ասաց. «Այս պահին մեր քաղաքական հայտը ներառում է 42 հազար քմ, որը պետք է միայն եւ միայն ընդլայնվի: Մենք ենք մեր պատմական հայրենիքի տերը, որեւիցե մեկը չի կարող ասել, որ վաղեմության խնդիր ունենք»:
Հռիփսիմե ՋԵԲԵՋՅԱՆ
