«Կոչումը համով կոնֆետն է, լավ բալիկ եմ, լավ եմ ինձ պահել, կակա են ինձ տալիս». Լալա Մնացականյան

Դերասանուհի Լալա Մնացականյանի համոզմամբ, նախագահի կողմից շնորհվող կոչումները խորհրդային տարիների մնացորդն են ու պետք է այդ ավանդույթին վերջ դնել:

Այսօր՝ անկախության օրվա առիթով, Սերժ Սարգսյանը արվեստի մի շարք գործիչների վաստակավոր արտիստի կոչումներ է շնորհել: Վաստակավորների թվում են երգիչներ Արամեն, Մհերը, Սիրուշոն, «Կարգին սերիալի» Մկոն եւ ուրիշներ:

«Ինձ համար դա սովետիզմ է, սովետական միության մնացորդներ՝ որպես մանիպուլյացիա մարդկանց համար: Կոչումներն ինձ համար արդեն ծիծաղելի, զավեշտալի են»,-Aravot.am-ին ասաց Լալա Մնացականյանը:

Նրա խոսքով, կարծրատիպ կա, որ եթե կոչում չունես, ուրեմն լավը չես. «Այդ խաղի կանոններն են մեզ հրամցնում: Մեզ հրամցնում են, որ եթե կոչում չունես, ուրեմն լավը չես: Մարդիկ էլ իրենց կոտորում են, որ լավը լինեն, էլ չգիտեն, որ կոչումները ոչ մի նշանակություն չունեն, մարդիկ կան, որ ոչ մի կոչում չունեն, բայց շատ սիրված ու հարգված են ժողովրդի կողմից, ու մարդիկ էլ կան, որ կոչումներ ունեն, բայց տեղյակ չեն, թե ովքեր են իրենք»:

Մեր հարցին, թե նախորդ փորձը հաշվի առնելով՝ ինչ եզրահանգման եք եկել, ովքեր են հիմնական կոչումներ ստացողները, դերասանուհին պատասխանեց. «Կոչումներն արդեն սկսում են ստանալ մարդիկ, ում որոշում է սիրել նախագահը կամ չսիրել: Այսինքն, սկսել ենք զբաղվել նրանով, որ մեզ նախագահը շատ սիրի, որ մեզ կոչում տա: Կոչումը համով կոնֆետն է, կակա են մեզ տալիս, լավ բալիկ եմ, լավ եմ ինձ պահել, կակա են ինձ տալիս»:

Արփինե ՍԻՄՈՆՅԱՆ