Հայաստանի Անկախության օրը ԵՊԲՀ թիվ 1 համալսարանական հիվանդանոցում նշեցին քառօրյա պատերազմում վիրավորված եւ այստեղ բուժում ստացող զինվորների հետ: Մերօրյա հերոսներին շնորհավորելու եկել էին հասարակական եւ մշակույթի գործիչներ՝ համոզմունքով, որ Հայրենիքը պաշտպանելու համար ամենաթանկը՝ առողջությունը, զոհած տղաներն ամենից լավ գիտեն Անկախության գինը եւ հենց նրանք պետք է լինեն բոլորիս ուշադրության կենտրոնում:
Արցախյան պատերազմի մասնակից, ազգային պարարվեստի գործիչ Գագիկ Գինոսյանը, շնորհավորելով տոնը եւ հիշելով նաեւ արցախյան ազատամարտում իրենց կյանքը հանուն անկախության զոհաբերած մեր հերոսներին, նշեց. «Այսօր երկու տեղ կա, որտեղ անկախությունը կարելի է նշել:
Դա Եռաբլուրն է եւ այս տղաները, որոնց շրջապատում կարելի է նշել մեր վաստակած անկախությունը: Այս երիտասարդ տղաները դեռ պետք է անկախությունը պաշտպանելու պատիվը փոխանցեն եկող սերնդին, որը պետք է այն պաշտպանի զորամասերում ու դիրքերում: Շնորհակալություն եմ հայտնում բոլոր բժիշկներին, որոնք տքնաջանորեն աշխատում են տղաներին շարք վերադարձնել, որպեսզի նրանք ոչ միայն մասնակցեն տոնախմբություններին, այլեւ Հայաստանի պաշտպանությանը այնքան ժամանակ մինչեւ մեր երկիրը դառնա ռազմավարորեն անխոցելի»:
Աշոտ ՀԱԿՈԲՅԱՆ
