«Երեւանյան հեռանկարներ» փառատոնը շարունակում է Հայաստան հրավիրել բարձր դասի աշխարհահռչակ երաժիշտների: Հոկտեմբերի 7-ին Ա. Սպենդիարյանի անվան օպերայի և բալետի ազգային ակադեմիական թատրոնում կկայանա հանրահայտ ամերիկացի սոպրանո Ռենե Ֆլեմինգի մենահամերգը:
Քառակի Գրեմմի մրցանակակրի մենահամերգը տեղի կունենա Ա. Սպենդիարյանի անվան օպերայի և բալետի ազգային ակադեմիական թատրոնում, թատրոնի սիմֆոնիկ նվագախմբի հետ` դիրիժոր Կոնստանտին Օրբելյանի ղեկավարությամբ: Համաշխարհային օպերային աստղի համերգը Օպերայի և բալետի ազգային ակադեմիական թատրոնի-85 ամյակի միջոցառումների համատեքստում է:
Հիշեցնենք, որ փառատոնն անց է կացվում ՀՀ Նախագահ Սերժ Սարգսյանի բարձր հովանու ներքո, ՀՀ մշակույթի նախարարության և Երևանի քաղաքապետարանի աջակցությամբ:
Ռենե Ֆլեմինգը մեր ժամանակների գերաստղ է, որը աշխարհի լավագույն օպերային թատրոնների բեմերում ելույթներին զուգահեռ, հանդես է եկել ամենանշանակալի առիթներով կազմակերպված միջոցառումներին` Խաղաղության Նոբելյան մրցանակի հանձման արարողությունից մինչև Պեկինի 2008 թվականի Օլիմպիական խաղեր, Բեռլինյան պատի անկման 25-րդ տարելիցը հիշատակող Բրանդենբուրգյան դարպասի մոտ կազմակերպված հեռուստատեսությամբ հեռարձակվող համերգին և Բուքինհեմյան պալատի պատշգամբից՝ Էլիզաբեթ II թագուհու ադամանդե տարելիցին նվիրված համերգին եւ այլն:
2013թ-ին Ֆլեմինգը երգել է Նախագահ Օբամայի երդմնակալության համերգին, Չեխիայի նախագահի կողմից հրավիրվել է երգելու Չեխիայի հեղափոխության 20-ամյակի առիթով: 2008թ-ին նա Մետրոպոլիտեն օպերայի հարյուրքսանհինգամյա պատմության մեջ առաջին կինը դարձավ, որը մենահամերգով հանդես է եկել բացման գիշերվա գալա համերգին։
Ռենե Ֆլեմինգը երգել է ոչ միայն Լուչիանո Պավարոտիի և Պլասիդո Դոմինգոյի, այլև Էլթոն Ջոնի, Փոլ Սայմոնի, Սթինգի, Մայքլ Բոլթոնի, Ջոշ Գրոբանի եւ այլոց հետ։
2010թ.-ին Դեկա և Մերկուրի ընկերությունները թողարկել են «Սև հույս» ձայնասկավառակը, որտեղ Ռենեն երգում է ռոք և փոփ արտիստների երգեր: Նրա ձայնը հնչում է «Մատանիների տիրակալը. թագավորի վերադարձը» ֆիլմում: Ի թիվս այլ ֆիլմերի, Ֆլեմինգի ձայնը լսելի է նաև 2017թ.-ի Վենետիկի կինոփառատոնի «Ոսկե Առյուծի» մրցանակակիր Գվիլեմո Տորոյի «Ջրի ձևը» ֆիլմում:
Գոհար ՀԱԿՈԲՅԱՆ
