Այսօր Ազգային ժողովի լիագումար նիստերի դահլիճում հայ խորհրդարանականների հետ հանդիպեց Միացյալ Թագավորության արտաքին գործերի եւ համագործակցության նախարարության Եվրոպայի եւ Ամերիկաների նախարար սըր Ալան Դանքնը:
Միացյալ Թագավորության նախարարին բավականին հետաքրքիր թվաց Հայաստանի խորհրդարանի կլոր դահլիճը: Նա հիշեց Արթուր թագավորին, որը իր թե զինակիցների, թե դաշնակիցների, թե հակառակորդների հետ սիրում էր նստել կլոր սեղանի շուրջ, որպեսզի պահպանի հավասարը հավասարին սկզբունքը:
Հայաստանի խորհրդարանի դահլիճի տեսքը բրիտանացի նախարարին թույլ տվեց ենթադրել, որ մեր խորհրդարանում սուր բանավեճեր առանձնապես չեն լինում, սուր անկյուններ չկան՝ ի տարբերություն անգլիական պառլամենտի, որտեղ դեմ առ դեմ սկզբունքով են նստում պատգամավորները: Այդ սկզբունքը մնացել է դեռ թագավորական ժամանակներից. այն ժամանակ պատգամավորները թրերով էին գալիս պառլամենտ եւ կողմերի միջեւ հեռավորությունը հաշվարկված էր 2 թուր եւ 2 դյույմ, որպեսզի եթե հակառակորդ պատգամավորները անգամ փորձեն իրար վրա թուր բարձրացնել՝ չկարողանան վնասել միմյանց:
Բրիտանացի նախարարի հավաստմամբ՝ իրենց խորհրդարանում ներկայացված են սոցիալական բոլոր շերտերը, բազմակարծությունն ապահովված է: 605 պատգամավորներից 45-ը նույնասեռականներ են, մեկ երրորդը կանայք են:
Նելլի ԳՐԻԳՈՐՅԱՆ
