Վարչապետ Կարեն Կարապետյանն այսօր կառավարության նիստում անդրադարձավ առցանց մատուցվող ծառայությունների շրջանակն ընդլայնելու խնդրին: Ասաց, որ այս տարվա սկզբից գործարկվել է երեխայի ծննդյան դեպքում միանվագ նպաստը առցանց ստանալու համակարգը` ներկայացված դիմումի հիման վրա, եւ այդ համակարգից արդեն իսկ օգտվել է շուրջ 15 հազար մարդ:
Ըստ նրա՝ «Իրականացված ուսումնասիրությունների արդյունքում պարզ է դարձել, որ առկա են խնդիրներ կենսաթոշակների եւ նպաստների անկանխիկ վճարման գործընթացում: Նշվածը պայմանավորված է բանկերի եւ համապատասխան պետական մարմինների միջեւ տեղեկատվության փոխանակության ընթացակարգերի թերություններով եւ վարչարարության ձեւական խնդրով»:
Կարեն Կարապետյանը աշխատանքի եւ սոցիալական հարցրեի նախարարին հանձնարարեց մինչեւ դեկտեմբերի 30-ը ձեռնարկել միջոցներ տեղեկատվության ստացումն ապահովելու, ենթահամակարգի մշակման աշխատանքներն ավարտելու ուղղությամբ եւ, ըստ անհրաժեշտության, հարցը քննարկել Կենտրոնական բանկի հետ, ինչպես նաեւ` պարզեցնել վարչարարությունը եւ գործնականում ապահովել կենսաթոշակների եւ նպաստների, այդ թվում` երեխաների ծննդյան եւ խնամքի նպաստների անկանխիկ եղանակով վճարելու ընթացակարգերի կիրառումը:
Լուսինե ԲՈՒԴԱՂՅԱՆ
