Սովորական գիհու պտուղները ժողովրդական բժշկության մեջ հայտնի են որպես մարսողության լավացման միջոց: Պատրաստուկներն ուժեղացնում են լեղարտադրությունն ու լեղու արտազատումը, խթանում են ստամոքսահյութի արտադրությունը, ունեն հակամանրէային եւ միզամուղ ազդեցություն: Եթերայուղը ունի բրոնխոլիտիկ, խորխաբեր եւ միզամուղ ազդեցություն:
Կիրառում են սրտային անբավարարության ժամանակ՝ որպես միզամուղ, այտուցներից խուսափելու նպատակով:
Պտուղների եփուկն ընդունում են ախորժակի լավացման եւ աղիքների շարժունակությունը խթանելու նպատակով: Որպես ախտահանիչ միջոց գիհու պատրաստուկները կիրառում են քրոնիկական պիելիտների, ցիստիտների, միզաքարային հիվանդության ժամանակ: Պտուղների եփուկը կիրառվում է նաեւ ռեւմատիզմի, պոդագրայի, արթրիտների բուժման ժամանակ:
Ջրաթուրմն օգտագործվում է ողողումների ձեւով վերին շնչուղիների բորբոքային հիվանդությունների ժամանակ՝ լարինգիտ, տրախեիտ, բրոնխիտ:
Բերանի խոռոչի բորբոքային հիվանդությունների ժամանակ խորհուրդ է տրվում 1 ճաշի գդալ պտուղներին ավելացնել 1 բաժակ եռման ջուր, թրմել սենյակային ջերմաստիճանում մինչեւ սառելը, քամել: Ստացված թուրմով օրը 3-4 անգամ կատարել ողողումներ:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
28.09.2017
