«Պալմիրա»` խխունջատիպ թխվածքներն այս անունն են կրում եւ սովորաբար լցոնված են լինում քաղցր միջուկով` շաքարավազ, դարչին, ընկույզ… Այսօր առաջարկում եմ պեստո թանձրուկով լցոնված պալմիրաների բաղադրատոմս:
Անհրաժեշտ մթերքները
Պեստո թանձրուկի համար
Բազիլիկ- 1 կապ
Կարդացեք նաև
Մայրու ընկույզ- 50 գրամ
Քերած պարմեզան-0,5 բաժակ
Ձիթապտղի յուղ-0,5 բաժակ
Սխտոր-1 պճեղ
Պալմիրայի համար
Շերտավոր խմոր- 500 գրամ
Չորացրած լոլիկներ- 10-15 հատիկ
Մոցարելա կամ ֆետա պանիր- 200 գրամ
Պեստո թանձրուկ- 0,5 բաժակ
Պատրաստման եղանակը
Պեստոն կարող եք գնել սուպերմարկետներից, սակայն կարող եք պատրաստել ինքներդ: Դրա համար անհրաժեշտ է 1 կապ բազիլիկ (կանաչ ռեհան), որը երբեմն հանդիպում է սուպերմարկետներում, իսկ երեկ ես գնեցի շուկայից եւ վաճառող կինն այն կոչում էր «սրբազան»: Եթե չգտնեք, կարող եք փոխարինել մաղադանոսով: Պետք է նաեւ կես բաժակ մայրու ընկույզ (кедровый орех), որը կարող եք փոխարինել սովորական ընկույզով, 3-4 ճաշի գդալ ձիթապտղի յուղ, 1 պճեղ սխտոր, կես բաժակ քերած պարմեզան: Բազիլիկի միայն տերեւները վերցրեք, ցողունը շատ կոպիտ է, լավ լվացեք, չորացրեք, եւ բլենդերով հարեք մյուս բաղադրիչների հետ միասին:
Շերտավոր խմորը գրտնակեք ուղղանկյունաձեւ: Վրան տարածեք պեստո թանձրուկից: (Ավելացած պեստոն մի քանի օր կարող եք պահպանել սառնարանում, պեստոյով շատ համեղ է լինում ցանկացած մակարոնեղեն, բրինձ, խաշած կարտոֆիլը): Ապա մանրեք ֆետա պանիր կամ մոցարելայի փոքրիկ գնդիկներ: Կտրատեք մի քանի հատ չորացրած լոլիկ: Այսպիսի լոլիկ` բուսական յուղի մեջ պահածոյացված, վաճառում են սուպերմարկետներում, սակայն կարող եք նաեւ ինքներդ պատրաստել հետեւյալ բաղադրատոմսով ` «Ընդարմացած լոլիկներ»: 
Խմորի մի եզրից սկսեք զգուշությամբ եւ ձիգ փաթաթել: Հենց հասնեք մեջտեղին, շուռ տվեք եւ փաթաթեք մյուս կողմից: Երկու կողմերը միացրեք իրար, որ եփվելիս չբացվի: Խմորը դրեք սառցախցիկ` 15-20 րոպեով, որպեսզի հետո հեշտ կտրատվի: Կարող եք նաեւ 0,5-1 ժամով դնել սառնարան:
Հանեք սառցախցիկից եւ կտրատեք 1 սմ լայնությամբ: Շարեք տապակի մեջ եւ դրեք նախապես 200-220 աստիճանով տաքացրած ջեռոցը` մոտ 15-20 րոպեով: Կարող եք մատուցել ինչպես տաք, այնպես էլ սառը վիճակում:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
