«Ես Նաիրի Հունանյանի աչքերի մեջ նայել եմ եւ հարցրել՝ ինչո՞ւ Յուրային, ո՞ւմ արյունն էր ծծել, ի՞նչ էր արել Յուրան». Բախշյան

«Ես Նաիրի Հունանյանի աչքերի մեջ նայել եմ եւ հարցրել՝ ինչո՞ւ Յուրային, ո՞ւմ արյունն էր ծծել, ի՞նչ էր արել Յուրան». Բախշյան

Մի քանի օրից կլրանա Հոկտեմբերի 27-ի ողբերգական իրադարձության 18 տարին: Մենք Հոկտեմբերի 27-ի զոհերից մեկի՝ Յուրի Բախշյանի կնոջից՝ Անահիտ Բախշյանից հետաքրքրվեցինք՝ այս տարիների ընթացքում Նաիրի Հունանյանի հետ հանդիպե՞լ եք, ի վիճակի՞ եք այսօր նրա աչքերի մեջ նայել, խոսել իր հետ, գուցե նա ձեզ ասելու բան ունենա: Տիկին Բախշյանը պատասխանեց. «Քանի տարի առաջ էր, լրագրողներդ այդպիսի հարց բարձրացրեցիք եւ ես ինձ թույլ տվեցի ընդամենը բանալու անցքից նայել, որ ինքը կա: Դրանից հետո ոչ մի տեղեկություն չունեմ, չեմ էլ հետաքրքրվել: Եթե հիմա Նաիրի Հունանյանի հետ դեմ-դիմաց նստելու հնարավորություն ստեղծվեր, ես կօգտվեի»:

Տիկին Բախշյանը պատմեց մի դրվագ՝ Նաիրի Հունանյանի հետ իր զրույցից, որը եղել է դատարանում. «Դատի ժամանակ, երբ Բախշյանի հետ կապված դատավարության մասը սկսվեց, ես իրեն հարցրել եմ անձամբ, աչքերի մեջ նայել եմ եւ ասել եմ՝ ինչո՞ւ Յուրային: Քո ասած ո՞ւմ արյունն էր ծծել, ի՞նչ էր արել Յուրան: Ինքը ինչ-որ հերյուրանքներ պատմեց, թե իբր Օդեսայում հայկական եկեղեցու բացումն է եղել, ինքը այդ ժամանակ այնտեղ էր ապրում, գնացել է իր գաղափարների վերաբերյալ փաթեթ է տվել Յուրային, Յուրան բանի տեղ չի դրել: Ես Օդեսայի ամբողջ տեսաերիզն ունեի, միջնորդեցի ու դատարանում նայեցինք:

Թափորը երեւում էր հայերով լեցուն, վերջում, այո Հունանյանը եւ իր եղբայրը կանգնած էին եւ ամբողջ ընթացքը տեսանկարահանված է: Նաիրի Հունանյանը ոչ մի պահ չի մոտենում Յուրային: Այսինքն, հորինել էր իր համար: Ես ասացի՝ մենք նույն թաղամասում ենք ապրել՝ կողք կողքի շենքերում, քո եղբայրն ու իմ աղջիկը նույն դասարանն են գնացել, դու այդ որտե՞ղ տեսար ու ե՞րբ հասկացար, որ Յուրան էլ է այն մարդկանց թվին պատկանում, ովքեր ժողովրդի արյունն են ծծել: Նա այդ հարցին չպատասխանեց, իհարկե: Ես մեղք եմ զգում, ամոթ եմ զգում, որ համառորեն չեմ պնդել, չեմ շարունակել, բայց մյուս կողմից էլ ես ուղղակի չգիտեի ինչ անել: Հիմա էլ արդեն 18 տարի է անցել, եւ ես…թեւերս կախվել են, իսկապես ունեմ մեղքի զգացում»:

Հռիփսիմե ՋԵԲԵՋՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք