Ադրբեջանը մի քանի փորձերից հետո հասկացել է, որ առաջնագծում որոշակի բաներ փոխվել են: Այս մասին Aravot.am-ի հետ զրույցում ասաց Արցախի Ազգային ժողովի ‹‹Վերածնունդ›› խմբակցության ղեկավար Հայկ Խանումյանը` անդրադառնալով Իլհամ Ալիևի այն հայտարարությանը, թե Հայաստանը փորձել է խանգարել ղարաբաղյան հակամարտության կարգավորմանն ուղղված բանակցությունները, սակայն չի հաջողվել:
‹‹Նրանք այլևս չեն կարող մեծ արդյունքի հասնել դիվերսիոն գործողությունների, դիպուկահարների և փոքր հրետակոծությունների մարտավարությունով: Ինչ-որ ձևով պետք այս ամենը մտնի դադարի փուլ, երևի հստակեցնելու համար հետագա մարտավարությունը: Իսկ դադարի փուլը սովորաբար նշանակում է բանակցություններ: Բնականաբար այդ բանակցությունների փուլ մտնելու համար արդարացում է պետք և ահա այդ արդարացումն էլ սա է. Հայաստանը ուզում էր ձախողել բանակցությունները, սակայն չհաջողվեց››:
Խոսելով Հայաստանի և Ադրբեջանի նախագահների հնարավոր հանդիպման վերաբերյալ՝ ԱԺ պատգամավորը շեշտեց, որ մեծ ակնկալիքներ չունի հանդիպումից. ‹‹Նույնիսկ այն հանդիպումները, որոնք վերջացել են որոշակի պայմանավորվածությունների ձեռք բերմամբ, չեն կատարվել: Բայց կարծում եմ այդ շրջանը մենք պետք է օգտագործենք մեր խնդիրները լուծելու համար: Նախորդ տարվա ապրիլից հետո խորքային խնդիրներ դեռևս առկա են››:
Հայկ Խանումյանի խոսքով՝ բանակցությունները ընդամենը փոքրիկ դադար են, որոնք պետք է օգտագործել առաջնագիծը ամրապնդելու և զուգահեռ աշխատելու Արցախի ճանաչման ուղղությամբ, ինչը նրա խոսքով վերջին տարիներին չի կատարվում: ‹‹Ես վստահ կարող եմ ասել, որ դրա հիմնական խոչընդոտողը Հայաստանն է: Չգիտես ինչու, Հայաստանը փորձում է կառչած մնալ բանակցությունների գաղափարին, այնինչ բանակցությունների գնալը ընդամենը պետք է որոշակի ծածկույթ լինի այլ գործողություների համար››, -նշում է Հայկ Խանումյանը
Դավիթ ԱԲԱՂՅԱՆ
