Վենետիկի հանձնաժողովն իր կայքում հրապարակել է Հայաստանի դատական օրենսգրքի նախագծի վերաբերյալ իր վերջին լիագումար նիստում ընդունված կարծիքի ամբողջական տեքստը:
Դրա եզրակացության մեջ նշվում է, որ դատական օրենսգրքի նախագիծը սահմանադրական բարեփոխումների արդյունքում դրական փոփոխություններ է իրականացնում (մասնավորապես, գերագույն դատական խորհուրդը և դատական համակարգի մյուս կոլեկտիվ մարմինները) և որոշ բացառություններով հանդերձ՝ հիմնականում համապատասխանում է եվրոպական չափանիշներին և եվրոպական լավագույն փորձին: Միաժամանակ այն իրենից ներկայացնում է չափազանց երկար, մանրամասն և խրթին փաստաթուղթ, որը կարիք ունի պարզեցման: Բացի այդ, դրանում կան մի շարք բացթողումներ և անհամապատասխանություններ, որոնց վրա պետք է աշխատել: Վենետիկի հանձնաժողովը խորհուրդ է տալիս.
-ապահովել Վճռաբեկ դատարանի բոլոր պալատների համար ընդհանուր նիստ՝ տարբեր պալատների դատական գործերը համապատասխանեցնելու և հնարավոր իրավական վեճերը լուծելու համար:
-Ստորին ատյանի դատարաններին կարելի է թույլատրել շեղվել սահմանված իրավական ակտից միայն Վճռաբեկ դատարանի վերահսկողությամբ և միայն այն դեպքում, երբ առկա են «ուժեղ փաստարկներ», որոնք կհիմնավորեն նման շեղումը:
-Oրենսգրքի նախագիծը պետք է պարզաբանի՝ ինչպես են որակավորման գրավոր քննության արդյունքները հաշվարկվում թեկնածուների ընտրության գործընթացում:
-Դատավորի վարքագծի կանոնները և պարտականությունները պետք է ձևակերպվեն ավելի հստակ՝ մատնանշելով վարքագծի որոշակի տեսակներ: 60-62-րդ հոդվածներում տեղ գտած ոչ հստակ և համընկնող բանաձևերը պետք է հեռացվեն կամ միացվեն մեկ ընդհանուր բանաձևի մեջ, որը պետք է մեկնաբանվի ավելի նեղ,
-դատավորների ոչ պատշաճ քաղաքական ներգրավվածության համար պատասխանատվությունը պետք է կիրառվի կարգապահական վարույթի շրջանակներում և պետք է կարգավորվի համաչափության սկզբունքով,
-օրենսգրքի նախագիծը պետք է տրամադրի կարգապահական հարցերում որոշումների դեմ բողոքարկման հնարավորություն,
-դատական դեպարտամենտը կարող է մնալ որպես կենտրոնական մարմին, որը վարչական աջակցության գործառույթներ է իրականացնում դատարանների նկատմամբ, պայմանով, որ նրա ղեկավարը նշանակվում է Գերագույն դատական խորհրդի կողմից և ենթարկվում է նրան:
Պատրաստեց Վիկտորյա ԱՆԴՐԵԱՍՅԱՆԸ
