Լրահոս
Օրվա լրահոսը

Կաշառք վերցնելու մեջ մեղադրվող դատավորը կհարցաքննվի դատարանում

Հոկտեմբեր 12,2017 22:48

Կաշառք պահանջելու եւ ստանալու մեջ մեղադրվող դատավոր Իշխան Բարսեղյանի գործով դատական նիստի ժամանակ այսօր նախագահող դատավորը հայտարարեց, որ գործով բոլոր ապացույցները հետազոտվել են, անցնում են հաջորդ փուլին՝ ամբաստանյալների հարցաքննությանը:

Դատարանի այս հայտարարությանն ի պատասխան պաշտպանական կողմը հարց բարձրացրեց՝ եթե մեղադրանքի հիմքում դրված է, մեղադրական եզրակացությունում նշված է, որ ապացույց է ճանաչվել  Իշխան Բարսեղյանի նկատմամբ կատարված ներքին ու արտաքին դիտումները, ինչու դրանք դատարանում չհետազոտվեցին:

«Դատարան բերեք, հետազոտենք, կիսատ հետազոտված ապացույցներով ոնց ենք ասում, որ հետազոտվեցին բոլոր ապացույցները»,- հարցրեց փաստաբան Վարդուհի Էլբակյանը:

Մեղադրող դատախազը կարծիք հայտնեց, որ կարող են անցնել հաջորդ փուլին, իսկ դատարան չներկայացված ապացույցների վերաբերյալ  դիրքորոշում կհայտնի իր ճառում:

«Ես նման դեպք, նման իրավիճակ չեմ տեսել ոչ մի քրեական գործով, երբ մեղադրանքի հիմքում դրվել է  ապացույցը, դատարան չի ներկայացվել, կողմը հարց է  բարձրացնում, որ բերեք ապացույցը, դատարան ներկայացրեք, դատավորն ասում է ոչինչ, որ այդ ապացույցը չկա, այսքանը  բավարար էր: Սա աբսուրդ է, ուզում ենք հասկանալ, Բարսեղյանի նկատմամբ արտաքին, ներքին դիտում կատարվե՞լ է, թե՞ չի կատարվել»,- ասաց տիկին Էլբակյանը:

Վարդուհի  Էլբակյանն արձանագրեց, որ նախագահող դատավորը կողմնակալ վերաբերմունք ունի եւ ժամանակ խնդրեց՝ նախագահող դատավորին ինքնաբացարկի միջնորդություն ներկայացնելու համար: Նախագահող դատավորը քսան րոպե ժամանակ տվեց, ինչը չբավականացրեց պաշտպանական կողմին միջնորդությունը ներկայացնելու համար: Մեղադրողն էլ  միջնորդեց հետաձգել դատական նիստը, քանի որ աշխատանքային ժամն արդեն անցել էր, դատարանը բավարարեց այդ միջնորդությունը: Հաջորդ դատական նիստին ցուցմունք կտան ամբաստանյալները:

Արփինե ՍԻՄՈՆՅԱՆ 

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հոկտեմբեր 2017
Երկ Երե Չոր Հնգ Ուրբ Շաբ Կիր
« Սեպ   Նոյ »
 1
2345678
9101112131415
16171819202122
23242526272829
3031