«Իրականացված ուսումնասիրությունից պարզ է դարձել, որ մի կողմից ապօրինի ծառահատումների համար սահմանված վարչական եւ քրեական պատասխանատվության միջոցները չեն նպաստում դրանց կանխարգելմանը: Մյուս կողմից վերջին տարիներին երեք անգամ նվազեցվել է բնափայտի մթերման օրինական ծավալները»,-այսօր նախքան կառավարության նիստի օրակարգին անցնելն՝ ասաց վարչապետ Կարեն Կարապետյանը:
Նա անտառների պահպանման եւ կառավարման արդյունավետության բարձրացման նպատակով հանձնարարական տվեց բնապահպանության, գյուղատնտեսության, տարածքային կառավարման եւ զարգացման նախարարներին՝ շարունակել անտառամերձ համայնքների բնակիչներին թափուկի անվճար տրամադրումը՝ առաջնությունը տալով սոցիալապես անապահով խմբերին եւ միաժամանակ ապահովել այդ գործընթացի թափանցիկությունը:
«Տասնօրյա ժամկետում համատեղ քննարկել եւ կառավարության աշխատակազմ ներկայացնել բնափայտի օրինական մթերման վերանայված եւ օպտիմալ ծավալները հիմնված բնական վերաճի եւ սահմանափակումների վրա: Երկամսյա ժամկետում համատեղ մշակել եւ կառավարության աշխատակազմ ներկայացնել ապօրինի անտառահատումների վերաբերյալ վարչական եւ քրեական պատասխանատվության միջոցների հստակեցման եւ խստացման վերաբերյալ իրավական ակտի նախագծեր:
Մենք, հաշվի առնելով ռեալ շուկայի ծավալները, գնահատելով, թե ինչքան է այնտեղ ստվերը, պետք է «Հայանտառ» ձեռնարկությունը բարեփոխումներ կատարենք, տրամաբանության չափով լեգալիզացնենք այդ անտառի հատումները, այդ ֆինանսական միջոցներն ուղղենք «Հայանտառ», որպեսզի իրենք պատրաստված լինեն գույքով, բոլոր անհրաժեշտ գործիքներով, որպեսզի հսկողությունը սահմանեն մաքսիմալ հստակ եւ կոշտ»,-ասաց վարչապետը:
Լուսինե ԲՈՒԴԱՂՅԱՆ
Շատ լավ է, որ վերջապես վերևներում սկսեցին հասկանալ խնդիրը, շատ ողջունելի է։ Ուղղակի մի լուրջ վտանգ կա այստեղ ու իր ասածների մեջ։ Դա այն միտքն է, որ ըստ էության ինքն ուզում է օրինականացնել անօրինական հատումները․․․