«Չգիտեմ՝ ինչ նկատառումներով է դա արվում: Բայց ես չեմ կարծում, որ որեւէ դատավոր փորձելու է ակցիայի մասնակցելով իր պրոֆեսիոնալ ցանկությունը կամ ունակությունը արտահայտել»,- այսօր լրագրողների հետ զրույցում ասաց ՍԴ նախագահ Գագիկ Հարությունյանը`պատասխանելով դիտարկմանը, որ ՀՀ նոր Սահմանադրությամբ Սահմանադրական դատարանի նախագահն ու դատավորները նոր լիազորություններ են ստացել. այժմ նրանք կարող են քաղաքական ակցիաներին մասնակցել, նաեւ կոչերով հանդես գալ:
Այսօր Երեւանում մեկնարկել է «Սահմանադրական դատարանների դերը Սահմանադրական կոնֆլիկտների հաղթահարման գործում» 22-րդ միջազգային խորհրդաժողովը: Այն կտեւի երեք օր:
Լրագրողների հետ զրույցում Գագիկ Հարությունյանը մտահոգություն հայտնեց`ՀՀ ԱԺ-ն հաճախ է հակասահմանադրական օրենքներ ընդունում։ Վերջին 8 տարիների վերլուծությամբ, ՀՀ ՍԴ-ն հակասահմանադրական է ճանաչել ավելի շատ օրենքներ, քան Ադրբեջանի, Վրաստանի, Լատվիայի, Լիտվիայի, Մոլդովայի Սահմանադրական դատարանները միասին վերցրած: Գագիկ Հարությունյանը դրա բացատրությունն ունի. իր կարծիքով, օրենսդրությունը չի հասցնում համապատասխանեցվել 10 տարին մեկ փոփոխվող Սահմանադրությանը. «Հիմա ստեղծվեց խորհուրդ, որը պետք է օգնի այս օրենսդրական հայեցակարգերի փոփոխությունների այնպես արագ իրականացմանը, որ ներդաշնակ լինի Սահմանադրությանը։ Այս պարագայում արդեն ակտը ընդունող մարմինները ստիպված են լինելու գույքագրել իրենց ընդունած իրավական ակտերը և փոփոխությունները կատարել ժամանակին, որ ամեն ինչ չհասնի Սահմանադրական դատարան»։
Նելլի ԳՐԻԳՈՐՅԱՆ
