Ավան եւ Նոր Նորք վարչական շրջանների ընդհանուր իրավասության դատարանում, ինչպես ավելի վաղ հայտնել էինք, այսօր 2016թ. ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» զինված խմբի անդամներից 10-ի՝ Արթուր Մելքոնյանի, Տիգրան Սարգսյանի, Արթուր Սողոմոնյանի, Գառնիկ Հովակիմյանի, Հովհաննես Վարդանյանի, Վարդգես Գեւորգյանի, Մանվել Աթոյանի, Արմեն Լամբարյանի, Աշոտ Պետրոսյանի, Խաչատուր Գիշչյանի եւ Կարո Եղնուկյանի մասերով միացված գործով առաջին նիստը հետաձգվեց:
«Պետք է մեկ մեղադրական եզրակացություն լինի, հետեւաբար, դատախազը պետք է կազմի այն: Դրանում յուրաքանչյուրի մեղադրանքը պետք է նկարագրված լինի: Մինչդեռ չունենք նման բան, հնարավոր չէ այս կերպ դատական նիստ անցկացնել, սա նորամուծություն է»,-լրագրողների հետ զրույցում ամբաստանյալներից Կարո Եղնուկյանի շահերի պաշտպան, փաստաբան Տիգրան Հայրապետյանն այսպես մեկնաբանեց գործի քննության նորովի մեկնարկը:
Հայրապետյանը կարծում է, որ նշյալ ամբաստանյալների մասերն արհեստականորեն են միացրել մեկ գործում՝ 4+7 սկզբունքով, մինչդեռ նախկինում դրանք առանձնացվել էին՝ արդար դատաքննության ողջամիտ ժամկետներ ապահովելու նպատակով:
«Եթե այդ ամբաստանյալները, որոնց մասերը միացվել են մեկ գործում, իրար հետ կապ ունենային, նրանց համար առանձին մեղադրական եզրակացություններ չէին գրվի: Հետեւաբար, ի՞նչ իմաստ ուներ 4-ին միացնել 7-ին»,-նկատեց փաստաբանը:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
