Լրահոս
Օրվա լրահոսը

Հաշմանդամություն ունեցողների խնդիրներին պետք է ավելի շատ իրազեկ լինեն որոշումներ կայացնողները

Հոկտեմբեր 20,2017 15:59

Այսօր Հայաստանի հաշմանդամների «Փյունիկ» միության եւ նրա գործընկեր՝ «Եվրախորհրդի չափանիշների քարոզչության կենտրոն» ՀԿ-ն Երեւանի եւ հանրապետության մարզերի հաշմանդամություն ունեցող շուրջ 120 անձանց մասնակցությամբ կազմակերպեցին մարաթոն՝ Երեւանից մինչեւ Էջմիածին:

Հայաստանի հաշմանդամություն ունեցողների «Փյունիկ» միության ծրագրերի ղեկավար Սուսաննա Սարգսյանն Aravot.am-ին ասաց. «Անվասայլակներով մարաթոնը մեր կազմակերպության ավանդական ծրագրերից մեկն է, որի նպատակը հաշմանդամություն ունեցող անձանց հիմնախնդիրների իրազեկումն է հասարակությանը: Նրանք մեր հասարակության լիարժեք անդամներն են եւ նրանց խնդիրներին պետք է իրազեկված լինեն բոլորը, առաջին հերթին՝ որոշում կայացնող մարմինները, որպեսզի ճիշտ որոշումներ ընդունեն: Բոլորը պետք է իմանան, որ հաշմանդամություն ունեցող անձինք շատ դեպքերում ավելի լիարժեք են, քան մենք՝ այսպես ասած, ոչ հաշմանդամ մարդիկ: Նրանք ի զորու են գործողություններ, քայլեր անել, որ մենք պարզապես կարող ենք միայն երազել: Օրինակ, հենց այս մարաթոնը: Մասնակիցներն իրենց ֆիզիկական խնդիրների բացը լրացնում են կամային որակներով: Նրանք սայլակներով, հեծանվով, վազքով, քայլքով պետք է անցնեն 22 կիլոմետր՝ ցույց տալով բացառիկ արժանիքներ: Նրանք ունեն հասարակության լիարժեք անդամը լինելու բոլոր իրավունքները: Արդյոք իրենց առողջ համարող մարդիկ կարո՞ղ են, կամ ցանկություն ունե՞ն հաղթահարել այդ տարածությունը: Ավելին, մենք նրանցից սովորելու շատ բան ունենք, որովհետեւ նրանք իսկապես կարողանում են անել անհնարինը: Ես 25 տարուց ավելի աշխատում եմ հաշմանդամություն ունեցող անձանց հետ եւ այդ ամբողջ ընթացքում սովորում եմ նրանցից, սովորում եմ պայքարել, ինքս ինձ պաշտպանել… Երբ շատ հարցերում թիկունքիդ հենարան չես զգում, պետք է ուժեղ լինես:

Մենք փորձում ենք օգնել նրանց, հասնել եւ պաշտպանել այնտեղ, որտեղ նրանք դժվարություն են ունենում, որպեսզի այնտեղ, որտեղ նրանց իրավունքը չի պաշտպանվում, կարողանանք ինչ-որ ձեւով աջակցել»:

Սուսաննա Սարգսյանի խոսքերով, այս մարաթոնը ոչ թե մրցություն է, այլ ինքդ քեզ ավելի լավ ճանաչելու եւ սեփական կարողությունները բացահայտելու եւ դրսեւորելու միջոց: «Սա ավելի շատ հասարակությանն իրազեկելու ակցիա է, որ ոչ թե ուշադրություն դարձվի իրենց թերություններին, այլ՝ արժանիքներին: Որ նրանք կարող են եւ իրավունք ունեն հասարակության լիարժեք անդամը լինել», – ասաց տիկին Սարգսյանը:

Աշոտ ՀԱԿՈԲՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հոկտեմբեր 2017
Երկ Երե Չոր Հնգ Ուրբ Շաբ Կիր
« Սեպ   Նոյ »
 1
2345678
9101112131415
16171819202122
23242526272829
3031