Aravot.am-ը ազատամարտիկ, ռազմական փորձագետ Արթուր Եղիազարյանից հետաքրքրվեց` արդյոք բնապահպանների ուշադրության կենտրոնում հայտնված Աշտարակի Սուրբ Կարմրավոր եկեղեցու և Նոր Եդեսիա համայնքի հոգևոր հովիվ տեր Ղեւոնդ քահանա Գափոյանի կրած զենքը, որ երեւում է լուսանկարում, որսորդակա՞ն է, եւ արդյոք ամեն ոք իրավունք ունի նման զենք կրելու:
«Նկարը որակյալ չէ, որքան էլ փորձեցի մեծացնել՝ հստակ դժվար է ասել, թե ինչ զենք է, պատկերը փչանում է: Նաև՝ զենքի պահած դիրքը հնարավորություն չի տալիս ավելի ճշգրիտ դիտարկում անել: Որոշակի նմանություն երևում է Կալաշնիկովի ավտոմատի հետ, բայց վստահ չեմ: Եթե ԱԿՄ է՝ ուրեմն միանշանակ որսորդական զենք չէ, մարտական է, իսկ մարտական զենքը նախատեսված չէ որսի համար, և բնականաբար մարտական զենք ամեն անձ կրելու իրավունք չունի: Մարտական զենքով նաև անարդյունավետ է փոքր կենդանիների ու թռչունների որսը, քանի որ փչացնում է այն»,-պատասխանեց ռազմական փորձագետը:
Քիչ անց էլ հավելեց. «Մի քիչ էլ ուշադիր նայելով՝ ավելի ՍԿՍ-ի (Самозарядный карабин Симонова) է նման, որը նախկինում մարտական էր, հիմա որսորդական է: Փամփուշտը՝ 7.62՝ ինչպես ԱԿՄ-ինն է»:
Հիշեցնենք, որ տեր Ղեւոնդն Aravot.am-ին ասել էր, որ ինքը մանկուց մեծացել է որսորդության մեջ, տեղյակ է, թե ինչ կարելի է որսալ, ինչ` ոչ, իսկ Կարմիր գրքում գրանցված սպանված թռչնի հետ կապ չունի:
Գոհար ՀԱԿՈԲՅԱՆ
Հ. Գ. Ի դեպ, Արագածոտնի Թեմի Դիվանը տեղեկացնում է. «Տարիներ առաջ իմանալով Տ. Ղևոնդ քահանա Գափոյանի` թույլատրելիի սահմաններում որսասիրական հակումների մասին՝ թեմական համապատասխան մարմինը հորդորել է Տեր Հորը հրաժարվել իր նախասիրությունից` այն գիտակցությամբ, որ արարչագործությունը սրբազան նվեր է մարդկությանը, իսկ նրա պահպանությունը նվիրական առաքելություն` անկախ կրոնական պատկանելությունից, սեռից, հասարակության մեջ գրաված դիրքից, մասնագիտությունից և կոչումից: Ավելին, Արագածոտնի Թեմի Թեմակալ Առաջնորդի կողմից Տեր Հայրն արժանացել է խիստ նկատողության և անցել ապաշխարության շրջան:
Econews.am 30.10.2017թ. հրապարակած հոդվածից հետո` խնդրո առարկա հարցն Արագածոտնի Թեմի համապատասխան մարմնի կողմից առնված է քննության:
Ուսումնասիրության եզրակացությունը` ի պահանջել հարկին, ընկալյալ կարգի համաձայն կներկայացվի Մայր Աթոռ Սուրբ Էջմիածնի Կարգապահական Հանձնախմբին` առ ի տնօրինություն»:
