Լրահոս
Օրվա լրահոսը

Բրաունի` շոկոլադային վայելք

Նոյեմբեր 05,2017 12:48

Ամերիկյան այս աղանդերն ունի պատրաստման բազմաթիվ եղանակներ, հարյուրավոր բաղադրատոմսեր, սակայն կան հիմնական մի քանի «կանոններ», որոնք բրաունին բրաունի են դարձնում: Նախ` շոկոլադի կամ կակաոյի առատությունը. հենց անունը «բրաունի»`  brown (շագանակագույն) բառից է, որը հուշում է, որ խմորեղենը մուգ գույն ունի: Այս թխվածքի մեջ սոդան կամ փխրեցուցիչը տեղ չունի, հետեւաբար, այն չի կարող լինել շատ բարձր եւ թեթեւ: Ալյուրի քանակն էլ բավականին քիչ պետք է լինի` կակաոյի փոշին լրացնում է ալյուրի տեղը: Եվ վերջին պայմանը` բրաունին չի ընդունում մարգարինի գոյությունն իր կյանքում, այնպես որ` կարագ եւ միայն կարագ:

Առաջարկում եմ բրաունիի մի շատ հաջող եւ փորձված տարբերակ:

Անհրաժեշտ մթերքները

Կարագ- 200 գրամ

Բուսական յուղ- 2 ճաշի գդալ

Շագանակագույն շաքարավազ- 3/4 բաժակ

Սպիտակ շաքարավազ-3/4 բաժակ

Ձու-4-5 հատ (կախված չափսից)

Ալյուր- 1 բաժակ

Կակաոյի փոշի-3/4 բաժակ

Աղ- կես թեյի գդալ

Դառը սեւ շոկոլադ- 150 գրամ

Պատրաստման եղանակը

Կարագը հալեցրեք: Կարագը, 2 ճաշի գդալ բուսական յուղը, շագանակագույն եւ սպիտակ շաքարավազները միասին լավ հարեք: Հատիկ-հատիկ ավելացրեք հավկիթները: Ապա ավելացրեք ալյուրն ու կակաոյի փոշին եւ աղը: 100 գրամ շոկոլադը նույնպես հալեցրեք եւ ավելացրեք խմորին (կարող եք շոկոլադը հալեցնել կարագի հետ միաժամանակ): Մնացած 50 գրամ շոկոլադը մանրեք եւ ավելացրեք խմորին:

Ջեռոցը նախապես միացրեք 170 աստիճանի վրա:

Ուղղանկյուն տապակի հատակին դրեք յուղաթերթ եւ վրան լցրեք խմորը: Քանի որ բավականին պինդ խմոր է, ինքն իրեն չի տարածվի, տարածեք հավասարաչափ: Դրեք ջեռոցը 35-40 րոպեով: Բրաունիի երեսը պետք է եփված լինի, ձեռքը չկպչի, սակայն միջուկը պետք է բավականին թացոտ լինի: Հանեք ջեռոցից եւ թողեք սառչի սենյակային ջերմաստիճանում, որից հետո կարող եք կտրատել փոքրիկ քառակուսի կտորների եւ մատուցել: Բրաունին մատուցում են պաղպաղակի, հարած սերուցքի հետ, կամ պարզապես` մի բաժակ սուրճի կամ թեյի:

Բարի ախորժակ:

Պատրաստեց Մելանյա ԲԱՐՍԵՂՅԱՆԸ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Նոյեմբեր 2017
Երկ Երե Չոր Հնգ Ուրբ Շաբ Կիր
« Հոկ   Դեկ »
 12345
6789101112
13141516171819
20212223242526
27282930