«Հարկային ծառայության մասին» եւ «Մաքսային ծառայության» օրենքներում լրացում կատարելու մասին ՊԵԿ-ի ներկայացրած նախագծի քննարկման ժամանակ «Ծառուկյան» խմբակցության պատգամավորները, տեսնելով, որ նախագիծը ՊԵԿ-ի հետ է առնչվում, նորից բարձրացրեցին «Առինջ մոլի» առեւտրականների հարցը, որի վերաբերյալ հայտարարություն էր տարածել ՊԵԿ-ը: Նրանք մեղադրեցին ՊԵԿ-ին էժան ապատեղեկատվություն եւ մանիպուլյացիա տարածելու մեջ:
ՊԵԿ փոխնախագահ Վախթանգ Միրումյանը արձագանքեց քննադատություններին. «Ինչ վերաբերում է համաչափ կամ ոչ համաչափ վարչարարությանը, ՊԵԿ-ի կողմից իրականացված գործողությունների օրինական կամ ոչ օրինական լինելուն, ներկայացված վերլուծությունների թույլ կամ ուժեղ լինելուն, ապա ասեմ՝ համաչափ վարչարարությունը հասկանալի կատեգորիա չէ մի քանի դեպքերում: Երբ շարունակաբար տնտեսվարող սուբյեկտը նախազգուշացվում եւ զգուշացվում է, իր ծանուցումից հետո կարող է չփոխել իր վարքագիծը եւ շարունակել թերհայտարարագրերի իրացման շրջանառությունը, այս դեպքում հասկանալի չէ, թե ինչ է նշանակում համաչափ կամ անհամաչափ վարչարարություն եւ որն է այն չափը, որը պետք է որոշվի»:
Նաիրա Զոհրաբյանն առաջարկել էր հաշվի առնել, թե որտեղ են գտնվում «Փեթակ» եւ «Սուրմալու» առեւտրի կետերը եւ որտեղ է գտնում «Առինջ մոլը»: Միրումյանի խոսքով՝ «Միգուցե փաստարկներ կան, որ պետք է հաշվի առնել, բայց այս դեպքում, երբ 10 ամիս շարունակ 200 տնտեսվարող սուբյեկտ կարող են ցույց տալ ընդամենը 1 մլն-ի իրացման շրջանառություն եւ ՊԵԿ-ը աչք փակի եւ որեւէ գործողություն չիրականացնի՞, իհարկե, պետք է իրականացնի իր գործառույթը, պետք է գործադրի այն վարչարարական գործիքները, որոնք իրեն տրված են»:
Ըստ Միրումյանի, օպերատիվ հետախուզական գործունեության մասին օրենքի 14-րդ հոդվածն է դա սահմանում, նաեւ՝ Հարկային վարչարարության մասին օրենքի 31, 32 հոդվածները:
Տեղից Էնֆիաջյանը բղավեց, որ այդ հոդվածներով խուզարկություն չի նախատեսվում, Միրումյանն էլ արձագանքեց. «Խուզարկություն ոչ ոք չի արել»:
Հռիփսիմե ՋԵԲԵՋՅԱՆ
