Քիչ առաջ Կենտրոնական ընտրական հանձնաժողովի մոտ բողոքի ցույց անցկացնող Պարույր Հայրիկյանի մոտ եկավ Հայաստանի դեմոկրատական կուսակցության նախագահ Արամ Սարգսյանը: Պարոն Սարգսյանն ասաց, որ իրենք զորակցում են ԱԻՄ-ի եւ Հայրիկյանի պայքարին: Հիշեցրեց, որ իրենց կուսակցությունը եւս դեմ էր իրականացված սահմանադրական բարեփոխումներին:
Արամ Սարգսյանը նաեւ նկատեց՝ «Տիգրան Մուկուչյանի հետ մենք խնդիր չունենք, մեր խնդիրը իշխող Հանրապետականի հետ է, որն իրականացրեց սահմանադրական փոփոխությունները»:
Արամ Սարգսյանը հիշեց նաեւ, թե ինչպես էր 1992-93 թվականներին Հանրապետական կուսակցությունը միացել քաղաքական ընդդիմադիր ուժերին, որոնք պայքարում էին Լեւոն Տեր-Պետրոսյանի եւ ՀՀՇ-ի սահմանադրության դեմ, բայց «կեսից փախան-մտան իշխանական կոալիցիա»:
Այլ մանրամասները, տեսանյութում:
Արամ Սարգսյանը կարծում է, որ իրենք փորձառու քաղաքական գործիչներ են եւ կարող են 200 հազար ստորագրություն հավաքել: Հիշում է, որ ժամանակին Լեւոն Տեր-Պետրոսյանն իրենց առաջարկել է՝ 200 հազար մարդ բերեք-կանգնեցրեք նախագահական պալատի դիմաց եւ ինքը հրաժարական կտա: Արամ Սարգսյանն ասում է՝ «նա գիտեր 200 հազարի ուժը»:
Արամ Սարգսյանը նաեւ հիշեցնում է, որ 1996-ի պայքարի կազմակերպիչներից էին ԱԻՄ-ն ու ՀԴԿ-ն: Aravot.am-ի հարցին՝ Վազգեն Մանուկյանն այսօր կմիանա՞ իրենց, Արամ Սարգսյանը հորդորեց հարցնել նրան:
Ի դեպ, ԱԻՄ-ին իր զորակցությունը հայտնեց նաեւ Միավորված կոմկուսի ներկայացուցիչ Էդուարդ Թովմասյանը:
Նելլի ԳՐԻԳՈՐՅԱՆ
