Հայկական հեռուստատեսության հիմնադիրներից Էդուարդ Եդիկիսելովը մտահոգված է, որ հեռուստաեթերում չափից ավելի են սերիալները:
«Տեսակետ» մամուլի ակումբում լրագրողների հետ հանդիպմանը պարոն Եդիկիսելովը հիշեց, որ իրենք ժամանակին ոչ թե սերիալ էին ցուցադրում, այլ ֆիլմեր նկարում: Օրինակ՝ ինքը նկարել է հայ կոմպոզիտորների մասին ֆիլմեր. «Այդ ֆիլմերով հեռուստադիտողին գիտելիք էր փոխանցվում: Իսկ այսօր՝ հեռուստասերիալ, սպանություն, բռնաբարություն, արյուն, դանակահարություն են մատուցում»:
Այն դիտարկմանը, թե հեռուստաընկերությունների պատճառաբանմամբ՝ այսօր հեռուստադիտողը դա է պահանջում, պարոն Եդիկիսելովն արձագանքեց. «Ի՞նչ է նշանակում՝ ժողովուրդը պահանջում է: Բայց երեխաներն ի՞նչ են սովորում: Ինչո՞ւ չեն սովորեցնում երեխաներին ոնց իրենց պահել, այլ սովորեցնում են՝ ոնց պետք է սեքսով զբաղվել: Դա վատ չէ, բայց պետք է համապատասխան տարիքում դա անել»:
Հայկական հեռուստատեսության հիմնադիրներից Համլետ Մանուկյանն էլ նկատեց, թե Հ1-ը, Հ2-ը վերցնում են ռուսական այն հաղորդումները, որոնք Ռուսաստանում մեծ հաջողություն ունեն, բայց այնպես են աղտոտում դրանք՝ ներկայացնում շատ ցածր մակարդակով, որ չես էլ ուզում նայել:
Ըստ նրա՝ «էն գլխից Լևոն Տեր-Պետրոսյանը հեռուստատեսությունը փչացրեց»: Այս առիթով պարոն Մանուկյանը մանրամասնեց. «Անկախության առաջին տարիներին, երբ ամեն ինչ սեփականաշնորհվեց, բոլորը դարձան փայատեր, միայն հեռուստատեսությունն ու օդանավակայանն էին, որ չսեփականաշնորհվեցին: Բայց այդ տարիներին հեռուստատեսության 3000-3500 աշխատողները ցրվեցին աշխարհով մեկ»:
Պարոն Մանուկյանն այսօրվա իրավիճակը հակադրեց 1950-60-ականներին, երբ հայկական հեռուստատեսությունը ՍՍՀՄ-ում լավագույնն էր: Իսկ այսօր իր ընկերները՝ լավագույն մասնագետները, Հայաստանում չեն, այլ սփռված են աշխարհով մեկ՝ ԱՄՆ, Ֆրանսիա:
Տաթև ՀԱՐՈՒԹՅՈՒՆՅԱՆ
