Երեւանում այսօր լրագրողների հետ ճեպազրույցում ՌԴ արտգործնախարար Սերգեյ Լավրովը մեկնաբանեց այն փաստը, որը ԱՄՆ-ն հրաժարվել է սատարել ՄԱԿ-ի անվտանգության խորհրդի դատապարտող հայտարարությունը:
Հիշեցնենք, որ երեկ Դամասկոսում ՌԴ դեսպանատան վրա հերթական հարձակումն է եղել. շենքն ականակոծվել է:
«Զարմացած չեմ ԱՄՆ-ի դիրքորոշումից…առաջին անգամ չէ, երբ մեր դեսպանատունը նման հարձակման է ենթարկվում: Եղել են դեպքեր, երբ արկերը հենց դեսպանատան տարածքում են ընկել: Ամեն անգամ ՄԱԿ-ի անվտանգության խորհուրդն ունակ չէր լինում արձագանքել այդ ահաբեկչական հարձակումներին եւ միջազգային իրավունքի նման խախտումներին»,-նկատեց Լավրովը:
Նրա խոսքով՝ ԱՄՆ-ի դիրքորոշումը չի կարող գործընկերային մոտեցում համարվել. «Դա ոչ կոռեկտ մոտեցում է: Ավելացնելու ոչինչ չունեմ, որովհետեւ Սիրիայում ԱՄՆ-ի հետ ահաբեկիչներին քննադատելու հարցում մենք հայտարարի չեկանք՝ դեռ խնդիրներ կան: Բացի այդ, տեղեկություններ կան, որ ԱՄՆ-ն իր օրակարգի համար է որոշակիորեն օգտագործում ծայրահեղական-ահաբեկչական խմբավորումներին»:
Սերգեյ Լավրովը հավելեց, որ առաջիկա օրերին Ռուսաստանը կշարունակի երկխոսել ամերիկացի գործընկերների հետ եւ խնդիրը քննարկել:
Լուիզա ՍՈՒՔԻԱՍՅԱՆ
