Էլեուտերոկոկը, կամ ինչպես ժողովրդական անվանումով է հայտնի՝ ազատասերմիկը, օժտված է տոնուսավորող, խթանող, հարմարողական հատկություններով: Խթանում է կենտրոնական նյարդային համակարգը, բարձրացնում օրգանիզմի շարժողական ակտիվությունը, լավացնում սեռական գեղձերի գործունեությունը, բարձրացնում օրգանիզմի դիմադրողականությունը միջավայրի անբարենպաստ ազդեցությունների նկատմամբ, լավացնում քնի որակը, վերացնում հոգնածությունը: Այն կիրառվում է որպես հակասթրեսային միջոց, ցածր ճնշման, ինչպես նաեւ վիրուսային վարակների կանխարգելման համար:
Մասնագետները նշում են, որ էլեուտերոկոկի հանուկի 20-30 կաթիլի ընդունումը ուտելուց 30 րոպե առաջ նշանակալիորեն մեծացնում է ֆիզիկական եւ մտավոր աշխատունակությունը, ավելացնում ֆիզիկական ուժը, նպաստում քաշի ավելացմանը, արյան մեջ հեմոգլոբինի բարձրացմանը, տեսողության եւ լսողության սրությանը: Պատրաստուկները խորհուրդ են տրվում նեւրոզների, նեւրասթենիայի, աթերոսկլերոզի, ախորժակի բացակայության, ծանր վիրահատություններից հետո, սեռական անտարբերության, անպտղության, ախտաբանական կլիմաքսի ժամանակ:
Դեղատոմսեր եւ պատրաստուկներ
Մրսածություն, հարբուխ
1 թեյի գդալ մանրացված կոճղարմատին ավելացնել 2 բաժակ եռման ջուր, թրմել փակ տարայի մեջ 10 րոպե: Ընդունել թեյի ձեւով:
Մտավոր եւ ֆիզիկական աշխատունակության բարձրացում
200 գրամ չոր մանրացված արմատներին ավելացնել 1 լիտր 40 տոկոսանոց օղի, թրմել չոր, սառը, մութ տեղում 14 օր՝ պարբերաբար խառնելով: Ընդունել 20-30 կաթիլից օրը 2-3 անգամ՝ ուտելուց 30 րոպե առաջ:
Արտաքին կիրառում՝ մազաթափության ժամանակ
10 գրամ մանրացված արմատներին ավելացնել 1 լիտր եռացրած ջուր, մարմանդ կրակի վրա հասցնել եռման, ավելացնել 10 գրամ գայլուկի պտղաբույլեր՝ կոներ, թրմել մինչեւ լրիվ սառելը, քամել: Ողողել լվացած մազերը, որից հետո թողնել չորանա:
Հակացուցումներ
Հղիություն, մինչեւ 18 տարեկան, արյան բարձր ճնշում, ճարպակալում, մաստոպատիա, տենդային վիճակներ:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
21.11.2017
