Tastin’France -ի շրջանակում Հայաստանում են ֆրանսիական գինու արտադրողներ: Նրանց թվում է Իվ Դիտրիխը: Նա ասաց, որ Հայաստանում հնարավորություն ունեցել է այցելել խաղողի այգիներ եւ հանդիպել այգիների, որտեղ աճեցվող խաղողատեսակները շատ չեն հանդիպում աշխարհում:
«Ես Էլզաս շրջանից եմ, իմ ձեռնարկությունն ընտանեկան է, ես եմ աշխատում եւ երկու որդիներս: Աճեցնում ենք հիմնականում ռիսլինգ տեսակի խաղող: Իմ կարծիքով, Էլզասի ամենակարեւոր հարստությունը հողատեսակների զանազանությունն է տարբեր խաղողատեսակների աճեցման համար: Աշխատում ենք հիմնականում ավազային հիմքով հողային հատվածների վրա, որտեղ ավելացնում ենք խճահող, ավազ, գրանիտ ու թերթաքար: Կախված նրանից, թե ինչ հիմք ենք օգտագործում, խաղողից ստացված գինիների համերը տարբեր են»,-նշեց ֆրանսիացի խաղողագործը, որ տպավորված էր Հայաստանով:
Նա նշեց, որ 18 հեկտար խաղողի այգի ունի, 6 հեկտար էլ պտղատու այլ ծառերի այգի: «Հայաստանն ինձ միշտ է հետաքրքրել, որովհետեւ գինու արտադրության բնօրրաներից մեկն է: Ինչ վերաբերում է գինուն, չեմ սիրում, երբ գինու մեջ շաքարի պարունակությունը բարձր է: Դրանք խաբուսիկ գինիներ են: Հայաստանում հասցրել եմ համտեսել կարմիր գինիներ, որոնք համային հատկանիշներով հետաքրքիր են թվացել ինձ»,-ասաց Դիտրիխը:
Գոհար ՀԱԿՈԲՅԱՆ
