Նոյեմբերի 22-ին 56 տարեկան հասակում Լոնդոնի իր բնակարանում գլխուղեղի քացկեղից մահացավ օպերային մեծանուն երգիչ Դմիտրի Խվորոստովսկին։ Այդ մասին առաջինը հայտարարեց նրա ընտանիքը երգչի պաշտոնական ֆեյսբուքյան էջում :
Խվորոստովսկին ընկալվում էր իբրեւ Հայաստանի բարեկամ: Այցերից մեկի ժամանակ էլ ասել էր, որ սիրում է Հայաստանը, որի հողն իր համար սուրբ է: Նա երկու անգամ էլ Հայաստան է այցելել «Երեւանյան հեռանկարներ» միջազգային երաժշտական փառատոնի կազմակերպիչների հրավերով:
Թվիթերում, Ֆեյսբուքում բազմաթիվ գրառումներ կան, սոցցանցերի օգատերերը սգում են արտիստի կորուստը, նրա մահը որակում ողբերգություն` երաժշտական աշխարհի համար:
2016 թ. վերջից Դմիտրի Խվորոստովսկին հայտարարել էր, որ առողջության վատթարացման պատճառով չի կարող մասնակցել օպերային ներկայացումների, իսկ վերջին անգամ Քովենտ Գարդենի, Լա Սկալայի, Մետրոպոլիտեն օպերայի եւ լավագույն այլ բեմերի աստղը երգել է ծննադավայր Կրասնոյարսկում:
Aravot.am-ի հետ զրույցում «Երեւանյան հեռանկարներ» փառատոնի գլխավոր մենեջեր Սոնա Հովհաննիսյանը նշեց. «Դմիտրի Խվորոստովսկին երկու անգամ մեր փառատոնի հյուրն է եղել: 2013թ. կազմակերպեցինք նրա մենահամերգը` ֆիլհարմոնիկ նվագախմբի հետ, դիրիժորն էլ Կոնստանտին Օրբելյանն էր: Դա այն հիշարժան երեկոն էր, երբ լուսահոգի Կոնստանտին Օրբելյանն էլ էր ներկա դահլիճում եւ նվագակցեց իրեն: Երկու տարի անց եւս Խվորոստովսկուն Հայաստան հրավիրեցինք «Պատերազմական երգեր» ծրագրով: Մեծ համերգ կայացավ` նվիրված մայիսյան հաղթան ակներին: Հայտնի ծրագիր ուներ Խվորոստովսկին Օրբելյանի հետ միասին: Բոլոր սիրելի երգերը ներառբված էին այդ ծրագրում»:
Տիկին Հովհաննիսյանը մեծ կորուստ որակեց Խվորոստովսկու մահը, նրան բնորոշեց որպես հրաշալի մարդ, որը ջերմ հայ ընկերներ ուներ, մասնավորապես ի դեմս Գեղամ Գրիգորյանի:
Գոհար ՀԱԿՈԲՅԱՆ
Լուսանկարները` Դմիտրի Խվորոստովսկու ֆեյսբուքյան պաշտոնական էջից:
