Քաղաքագետ Ալեքսանդր Իսկանդարյանի կարծիքով, Ռուսաստանի արտգործնախարար Սերգեյ Լավրովի հայաստանյան այցը Հայաստան-Ռուսաստան դիվանագիտական հարաբերությունների քսանհինգ ամյակի առիթով է:
«Երբ այց է լինում Բաքու և Երևան, ենթադրվում է, որ պետք է լինի ԼՂ կարգավորման հարցի քննարկում, ինչը եղել է: Լավրովն ինքն ասաց, որ որևէ լուրջ փոփոխություն անհնար է ակնկալել:
Պարզապես, լրագրողների մոտ չարդարացված սպասումներ կան ամեն այցից, հանդիպումից, սակայն անհնար է, որ ինչ-որ բան փոխվի: Այցերով հիմնականում ցանկանում են իրավիճակը պահել այնպես, ինչպես կա: Այցը ուներ այն նշանակությունը, որն ուներ»,- այսօր «Հենարան» ակումբում ասաց քաղաքագետը:
Ըստ նրա՝ ԼՂ կարգավորման հարցը շարունակում է մնալ ԵԱՀԿ ՄԽ շրջանակներում, բայց այս դեպքում էլ մեծ սպասելիքներն անիմաստ են.
«Կարելի է ասել, որ ԵԱՀԿ ՄԽ-ն հակամարտության մենեջմենթով է զբաղվում, ոչ թե հենց բուն կոնֆլիկտով»:
Ալեքսանդր Իսկանդարյանը ռազմական ուժի մակարդակի նվազումը քաղաքական և ռազմական երկարատեւ աշխատանքի արդյունք է համարում. «Այդ ամենն արվում է, որ գործընթացը դուրս չգա վերահսկողությունից և չվերածվի էսկալացիայի»:
Արփինե ՍԻՄՈՆՅԱՆ
