2018 թվականից շրջանառության մեջ կդրվեն նոր թղթադրամներ: ՀՀ կենտրոնական բանկը ներկայացրել է երրորդ սերնդի թղթադրամների էսքիզները։ Ըստ այդմ` 1000-դրամանոցը նվիրված կլինի Պարույր Սևակին, 2000-դրամանոցը՝ Տիգրան Պետրոսյանին, 5000-դրամանոցը՝ Վիլյամ Սարոյանին, 10000-դրամանոցը՝ Կոմիտասին, 20000-դրամանոցը՝ Հովհաննես Այվազովսկուն, 50000-դրամանոցը՝ Գրիգոր Լուսավորչին: 100000 դրամանոց թղթադրամներ այլևս չեն թողարկվի:
Թղթադրամների էսքիզները բուռն քննարկման առարկա են դարձել սոցցանցերում, շատ օգտատերեր, ծաղրի ենթարկելով դրանք, առաջարկել են թղթադրամի իրենց տարբերակը` իրենց ու հայտնի մարդկանց նկարներով (Շեր, Տիգրան Մուկուչյան, Սամվել Մարտիրոսյան):
Արվեստագետ Սահակ Պողոսյանն, օրինակ, նկատել է, որ վաղուց անցել են ժամանակները, երբ դրամի վրա ինչ-որ մեկի պատկերը պետք է լինի:
Արեւելագետ Վարդան Ոսկանյանն էլ գրում է , թե հայկական ֆեյսբուքը քննարկում է նոր փողերի դիզայնը, ու չկա մեկը, որ խոսի աշխատավարձերում ու թոշակներում դրանց քանակի` եկող տարի լրիվ նույնը մնալու մասին:
Aravot.am-ը Հայաստանի նկարիչների միության նախագահ Կարեն Աղամյանից հետաքրքրվեց` իբրեւ նկարիչ, ի՞նչ կարծիքի է 2018-ից շրջանառության մտնող նոր թղթադրամների տեսքի մասին:
«Փողն առաջին հերթին նկարչություն չէ, կարեւորը նրա ֆունկցիան է: Թղթադրամի նշանակությունն այն է, որ կեղծիքից կարողանա խուսափել: Իսկ դիտարկելով որպես գեղագիտական արժեք, ասեմ, որ այնտեղ առանձնապես վատ բան չեմ տեսնում: Գուցե հնարավոր էր ավելի լավ անել, բայց վատ էլ չէ: Թղթադրամները հստակ գունային տարբերություններ ունեն: Օգտակար կլինի 2000-անոցի առկայությունը»,-ասաց Նկարիչների միության նախագահը:
Նա հիշեց նաեւ հին խորհրդային դրամները. «Սովետական ռուբլիների դիզայնը համաշխարհային մշակույթի մեջ մտած բան էր, ամեն ինչ շատ ճիշտ էր արված: Դրանք չափերով էլ էին տարբեր, գույներով էլ: Շատ հեշտ էր տարբերել մեկ ռուբլին, երեքը, հինգը… Օրինակ հայկական դրամների պարագայում 1000 դրամանոցը եւ 5000-անոցը բավականին նման են եւ հաճախ շփոթում են, դա անթույլատրելի սխալ էր: Նոր նմուշների դեպքում բոլոր դրամները հստակ տարբերվում են գույներով, ինչն արդեն լավ է: Լավ կլիներ չափերով էլ տարբերվեին, որովհետեւ կան շատ երկրներ, որտեղ փողերը չափերով տարբերվում են»:
Գոհար ՀԱԿՈԲՅԱՆ
