Լրահոս
Օրվա լրահոսը

Արմեն Աշոտյանը՝ «Մոլոդայա գվարդիային». Աշխարհը վաղուց դուրս է եկել այն թոք շոուների ձևաչափից, որտեղ տարբեր բևեռներ են ստեղծվում, որպեսզի լարում մտցվի

Դեկտեմբեր 01,2017 16:13

ԱԺ արտաքին հարաբերությունների մշտական հանձնաժողովի նախագահ, ՀՀԿ փոխնախագահ Արմեն Աշոտյանն այսօր Ազգային ժողովում Ռուսաստանի Դաշնության իշխող «Միասնական Ռուսաստան» («Единая Россия») կուսակցության երիտասարդական կազմակերպության՝ «Մոլոդայա գվարդիայի» պատվիրակների հետ հանդիպման ընթացքում անդրադարձել է ՀՀ արտաքին քաղաքականությանը, Ռուսաստանի Դաշնության հետ հարաբերություններին։

Ըստ պարոն Աշոտյանի՝ ՀՀԿ միջազգային հարաբերությունների վեկտորը շատ լայն է, և այն համընկնում է ՀՀ արտաքին քաղաքական ուղղությունների հետ։ Հանդիպման ընթացքում նա անդրադարձավ «Միասնական Ռուսաստան» կուսակցության հետ համագործակցությանը՝ նշելով, որ ՀՀԿ-ն այս քաղաքական ուժի հետ ունի միջկուսակցական փոխգործակցության համաձայնագիր, որը մշտապես թարմացվում է։ Պարոն Աշոտյանը նշեց Չինաստանի Կոմունիստական կուսակցության հետ ակտիվ համագործակցությունը։ Ըստ նրա՝ երրորդ արտաքին քաղաքական առաջնահերթությունը եվրոպական ուղղության հետ է կապված, և ՀՀԿ-ն Եվրոպայի ժողովրդական կուսակցության մեծ ընտանիքի անդամ է։ ՀՀԿ փոխնախագահը նկատեց, որ իրենք ակտիվ աշխատանքներ են տանում նաև այլ կուսակցությունների հետ։

Արմեն Աշոտյանը երիտասարդական կառույցներին կոչ արեց ընդլայնել կապերն ու համագործակցության շրջանակները, քանի որ երիտասարդության համար շատ ավելի հեշտ է. նրանք ավելի քիչ են ուշադրություն դարձնում ձևականություններին, պայմանականություններին, ավելի հեշտ են պայմանավորվածություններ ձեռք բերում։ Նա նշեց, որ երիտասարդների այսօրվա օրը պետք է ծառայի վաղվա համար։

Ի դեպ, «Մոլոդայա գվարդիայի» ներկայացուցիչներն ԱԺ էին ժամանել այն ժամանակ, երբ ընթանում էին խորհրդարանական լսումներ` «Հայաստան-ԵՄ. համապարփակ և ընդլայնված գործընկերություն» թեմայով։ ՀՀԿ փոխնախագահը, անդրադառնալով ՀՀ-ԵՄ հարաբերություններին, նշեց, որ ժամանակակից աշխարհը բազմակողմ է, շատ են տարբեր հարթությունները։ Այսօրվա միջազգային հարաբերությունները միագիծ չեն, դրանք ծավալուն են, պատկերավոր ասած, 3D ձևաչափում։ Եվ մենք կյանքի ենք կոչում արտաքին քաղաքականություն՝ հիմնված հենց եռաչափ հարթության վրա՝ լրացնելով հայ-ռուսական հարաբերություններն այն ամենով, ինչ հնարավոր է լրացնել Եվրամիության կողմից։

Ըստ պարոն Աշոտյանի՝ աշխարհը վաղուց սև-սպիտակ չէ։ Աշխարհը վաղուց դուրս է եկել այն թոք շոուների ձևաչափից, որտեղ տարբեր բևեռներ են ստեղծվում, որպեսզի լարում մտցվի, հանդիսատես գրավվի՝ գովազդային ժամանակ վաճառելու համար։ Իրական քաղաքականության մեջ ռեկլամային ժամանակ չի վաճառվում։ Այդ իսկ պատճառով Արմեն Աշոտյանը երիտասարդներին անկեղծ երկխոսության, մարդկային կապիտալ կուտակելու կոչ արեց, որպեսզի կողմերն առավելագույնս հասկանան միմյանց, և ապագայում այդ հարաբերությունները վերարտադրվեն։

Նշենք, որ «Եդինայա Ռոսիա» կուսակցության երիտասարդական կազմակերպության անդամներն այս օրերին Երևանում են գտնվում իրենց գործընկերների՝ ՀՀԿ երիտասարդական կազմակերպության հրավերով։ Այցի կազմակերպումը նպատակ ունի սերտացնել երկու կառույցների միջև համագործակցությունը։

 

ՀՀԿ երիտասարդական կազմակերպություն

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Դեկտեմբեր 2017
Երկ Երե Չոր Հնգ Ուրբ Շաբ Կիր
« Նոյ   Հուն »
 123
45678910
11121314151617
18192021222324
25262728293031