Սպանված Եղիշե Խաչատրյանի մայրն այլեւս դատարան չի կարող գալ. վիճակը ծայրահեղ է

Սպանված Եղիշե Խաչատրյանի մայրն այլեւս դատարան չի կարող գալ. վիճակը ծայրահեղ է

Էրեբունի եւ Նուբարաշեն վարչական շրջանների ընդհանուր իրավասության դատարանում այսօր դատավոր Աննա Դանիբեկյանի նախագահությամբ լեզվաբան Փառանձեմ Մեյթիխանյանի ամուսնու՝ Եղիշե Խաչատրյանի սպանության գործով հերթական դատական նիստն է: Հիշեցնենք, որ նրան դիտավորությամբ հարվածներ հասցնելով կյանքից զրկելու մեջ մեղադրվում են երիտասարդներ Յուրի Հակոբյանը, Խաչիկ Կոսյանը, Արարատ Նիկողոսյանը, Արտաշես Չիչոյանը, Արթուր Զաքարյանը:

Ըստ դեպքի ականատես ու գործով տուժող, Խաչատրյանի մոր՝ Էմմա Աբրահամյանի վկայությամբ՝ իր որդին արգելակել է վթարից խուսափելու համար, իսկ նշյալ երիտասարդները ծեծելով սպանել են նրան: Տեւական ժամանակ նիստեր չէին կայանում, որովհետեւ հարցաքննության ժամանակ 77-ամյա Էմմա Աբրահամյանը կատարվածը հիշելիս վատանում էր եւ հիվանդանոց տեղափոխվում: Այսօրվա նիստում նրա շահերի ներկայացուցիչ, փաստաբան Ինեսա Պետրոսյանը դատարանին հայտնեց, որ ըստ բժշկական փաստաթղթի՝ Էմմա Աբրահամյանն ունի սրտի իշեմիկ հիվանդություն, ստենոկարդիա եւ մի շարք այլ խնդիրներ:

«Նրան խորհուրդ չի տրվում ներկայանալ դատարան, նա ի վիճակի չէ եւ չի կարող գալ: Չորս նիստում նա արդեն իսկ ցուցմունք տվել է եւ պատասխանել կողմերի հարցերին: Ամեն անգամ կատարվածը վերապրելը նրան այդ վիճակին է հասցնում»,-հայտարարեց Ինեսա Պետրոսյանը՝ միջնորդելով Էմմա Աբրահամյանի հարցաքննությունը համարել ավարտված:

Ամբաստանյալների պաշտպաններն առարկեցին՝ ասելով, որ դատարանը նման որոշում կայացնելու իրավունք չունի, իսկ իրենց հարցերը կիսատ են մնացել: Ավելին՝ անգամ ամբաստանյալների հարցեր տալու հերթը չի հասել: Պաշտպաններից Լիպարիտ Սիմոնյանը նկատեց. «Բժիշկը չի կարող գնահատել՝ Էմմա Աբրահամյանն, օրինակ, տասը որում կարո՞ղ է նիստի գալ, թե ոչ: Դատարանը պետք է հնարավորություններ ստեղծի՝ տուժող Աբրահամյանի լիարժեք հարցաքննությունն ապահովելու համար»:

Ամբաստանյալների պաշտպաններն ընդգծեցին, որ իրենց պաշտպանյալներին առաջադրված մեղադրանքի հիմքում հենց Էմմա Աբրահամյանի ցուցմունքն է, որի առնչությամբ նաեւ հակասություններ կան, ուստի նրա ներկայությունը պարտադիր է: Դատավոր Աննա Դանիբեկյանը, լսելով կողմերի կարծիքները, որոշեց պաշտպանական կողմին ժամանակ տալ՝ ծանոթանալու տուժող կողմի ներկայացրած բժշկական փաստաթղթերին: Դատարանը եւս գտնում է, որ Էմմա Աբրահամյանի հարցաքննությունը պետք է համարել ավարտված:

Այլ մանրամասներն՝ առաջիկայում:

Լուիզա ՍՈՒՔԻԱՍՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք