Այսօր վերջին անգամ Վերահսկիչ պալատի տարեկան գործունեության ծրագիրը ներկայացվեց ԱԺ-ի քննարկմանը:
Ինչպես տեղեկացրել ենք, Սահմանադրական փոփոխություններով պայմանավորված՝ 2018-ի ապրիլից Վերահսկիչ պալատը դառնալու է Հաշվեքննիչ պալատ, իսկ Հաշվեքննիչ պալատն անկախ մարմին է եւ ինքն է հաստատելու հաշվեքննության թեմաները:
Այս մասին ԱԺ-ում ասաց ՎՊ նախագահ Լեւոն Յոլյանը:
Հաջորդ տարվա ծրագրով արդեն ընտրված են մի քանի ոլորտներ, որոնցում պետք է պալատն իրականացնի ուսումնասիրություն ու արդեն ուսումնասիրելու են ոչ միայն դրամաշնորհային ծրագրերը, այլեւ պետբյուջեի միջոցների հաշվին իրականացված ծրագրերի արդյունավետությունը. «Արդյունքում՝ բոլոր ծրագրերի ընթացքի վերաբերյալ կունենանք համապարփակ պատկեր»:
Հաջորդ տարվա ծրագրում ընդգրկվել է աշխատանքի եւ սոցիալական հարցերի, էներգետիկայի եւ բնական պաշարների, տնտեսական զարգացման եւ ներդրումների, բնապահպանության, ինչպես նաեւ արտակարգ իրավիճակների նախարարությունը: 2018-ին կուսումնասիրվեն նաեւ Քաղաքացիական ավիացիայի գլխավոր վարչությունը, ԵՏՄ հանձնաժողովը եւ անդամ պետությունների ներմուծման մաքսատուրքերը:
Իսկ ՀՀԿ պատգամավոր Գագիկ Մինասյանը ներկայացրեց իր, Գալուստ Սահակյանի եւ Սամվել Նիկոյանի հեղինակած «Հաշվեքննիչ պալատի մասին» նախագիծը, որը սահմանում է հաշվեքննության պայմանները, պահանջները:
«Ծառուկյան» խմբակցության պատգամավոր Սերգեյ Բագրատյանը հարցրեց՝ ԱԺ-ն քիչ առաջ լսեց Վերահսկիչ պալատի տարեկան գործունեության ծրագիրը, մենք եթե հաստատում ենք այդ ծրագիրը, 2018-ի ապրիլից հետո Հաշվեքննիչ պալատն այդ ծրագրո՞վ է աշխատելու: Սամվել Նիկոյանը պատասխանեց, որ մինչեւ ապրիլի 9-ը ՎՊ-ն իրականացնելու է վերահսկողություն, իսկ ապրիլի 9-ից հետո հաշվեքննություն: Նիկոյանն ասաց, որ մամուլում սխալ են մեկնաբանում, թե ՎՊ-ից վերցնում են վերահսկողություն իրականացնելու գործառույթը: Իրականում, ըստ նրա, լիազորություններն ավելի են մեծանում, հաշվեքննությունն իր մեջ ներառում է նաեւ ստուգումը:
Մանե Թանդիլյանը բացատրեց, որ հաշվեքննիչը նույն աուդիտորն է՝ հանրային ոլորտում ու հաշվեքննիչ պալատի կարեւորագույն գործառույթը նրա անկախությունն է: Թանդիլյանը նշեց, որ եթե աուդիտորները անկախ չլինեն, որեւէ վստահություն այդ մարմնի նկատմամբ չի լինի:
Մանե Թանդիլյանը նշեց, որ բյուջեի կատարողականի ժամանակ թվեր են ներկայացվում ու հիմա մենք չենք կարող իմանալ՝ որքանո՞վ են ճիշտ ներկայացվում, պետք է ստուգել համապատասխանությունը ու դա կարող է անել աուդիտորը: Նա հույս հայտնեց, որ այս աշխատանքների մեջ պետական ապարատում չաշխատած եւ միջազգային որակավորում ունեցողներ կներգրավեն:
Հռիփսիմե ՋԵԲԵՋՅԱՆ
