«Սա նույնպես պատերազմ է, և այս պատերազմում բանաստեղծը պետք է հաղթող լինի». բանասիրական գիտությունների դոկտոր, պրոֆեսոր, ԵՊՀ դասախոս Սամվել Մուրադյանի հորդորն է երիտասարդ գրող Տարոն Գլակին, որի հեղինակած «Գետի ափին» բանաստեղծությունների ժողովածուն, գրականագետի բնորոշմամբ, աչքի է ընկնում անկեղծ շարադրանքով և մտահոգություններով:
Գիրքը Տարոն Գլակի երկրորդ աշխատությունն է և լույս է տեսել Մշակույթի նախարարության աջակցությամբ: Պարզ, բայց միևնույն ժամանակ ոչ պարզունակ համեմատություններով ու ձևակերպումներով հարուստ բանաստեղծությունների այս գողտրիկ գրքույկը գրականագետը, իր խոսքով՝ որպես փոքրիկ մասնագիտական խորամանկություն, նախ ցույց է տվել իր ուսանողներին, ովքեր միաձայն նկատել են Հայրենիքի հանդեպ անկեղծ սեր և շիտակ գնահատականների առատություն երիտասարդ հեղինակի ստեղծագործություններում:
Շնորհանդեսի ավարտին գրականագետ Սամվել Մուրադյանը հորդորեց Տարոն Գլակին չդադարել ստեղծագործել, շարունակել ուսումնասիրել հայ դասականների ստեղծագործություններն ու պահպանել բանաստեղծական ազնվությունն ու պարզությունը:
Ազգային գրադարանում ժողովածուի վերաբերյալ գնահատականներ հնչեցրին նաև Համահայկական գրողների միության նախագահ Աբգար Ափինյանը, դրամատուրգ Սամվել Խալաթյանը, «Արմավ» հրատարակչության խմբագիր Արմեն Ավանեսյանը, բանաստեղծուհի Սուսաննա Ղազարյանը և այլք:
Սուրեն ՍԱՐԳՍՅԱՆ
