«Համոզված եմ, որ բռնությունները կանխվում են բռնությամբ: Գրավելով ՊՊԾ գունդը՝ մենք ազատագրել ենք այն եւ դրա տարածքում 4-րդ հանրապետություն ենք ստեղծել, որը մտադիր ենք վերականգնել»,-ոստիկանության ՊՊԾ գունդը գրաված եւ ծանր հանցագործությունների մեջ մեղադրվող «Սասնա ծռեր» խմբի անդամների գործով դատական նիստում այսօր հայտարարեց ամբաստանյալներից Մարտիրոս Հակոբյանը՝ «Դեդը»՝ այդպես կարծիք արտահայտելով իրեն առաջադրված մեղադրանքների առնչությամբ:
«Լավ է լինել ոչխարի գլուխ, քան առյուծի պոչ եւ ծառայել իշխանություններին: Ես ծնվել եմ կռվելու եւ հաղթելու համար: Նաեւ նրա համար, որ նահատակվեմ ինչպես Մարտիրոս»,-ասաց Մարտիրոս Հակոբյանը:
Ամբաստանյալներից Սերգեյ Կյուրեղյանն էլ նշեց, որ որպես հայ՝ ինքը պարտավորություն է ունեցել ապստամբելու, իր խոսքով, երկիրը զավթած բռնապետության դեմ. «Հայն այստեղ ճնշված է եւ դժբախտ: Իսկ երբ լքում է երկիրը, ավելի ազատ է ապրում, թեկուզ եւ Հայաստանից ավելի աղքատ երկրում»:
Ամբաստանյալներից Գեւորգ Իրիցյանն էլ պնդեց, որ բռնապետության դեմ պայքարի միակ միջոցն ապստամբության իրավունքն իրացնելն էր:
«Սասնա ծռերը» բոլորն էլ հայտարարեցին, որ իրենց առաջադրված մեղադրանքները չեն ընդունում:
Լուիզա ՍՈՒՔԻԱՍՅԱՆ